Фуқароларни Кореяда ишлашга жўнатишни ваъда қилган агентликдан жабр кўрганларнинг пулларини қайтариш бошланди

Profelite IMP хусусий бандлик агентлиги Кореяда ишлаш ниятидаги юзлаб ўзбекистонликларни алдагани ҳақида хабар берилган эди. Хабарда алданган фуқароларнинг айримлари ўзини ўлдириш ва оиласидан ажрашиш даражасига етгани, агентлик раҳбарига нисбатан жиноий иш очилгани ва у қидирувга берилгани таъкидланганди.

Кўпчиликни ушбу жамиятдан жабр кўрган фуқароларнинг пул маблағлари нима бўлади, деган савол қизиқтирган ва бу бўйича «Kun.uz» нашри Мажбурий ижро бюроси билан боғланган.

МИБ матбуот хизматининг маълум қилишича, Жиноят ишлари бўйича Сергели туман судининг жабрланувчиларга зарар пулларини қайтарилиши юзасидан ижро ҳужжатлари Мажбурий ижро бюросига шу йил 28 сентябрь куни келиб тушган.

«Ҳозир Мажбурий ижро бюроси томонидан ташкил этилган ҳудудлардаги ишчи гуруҳларга 37 нафар жабр кўрган фуқаролар ҳисоб-рақамлари тўғрисидаги аризалар билан мурожаат қилиб, уларга зарар пуллари пропорционал тартибда ўтказилиши таъминланди.

Моддий зарарни қайтариш масаласида мурожаат этмаган 226 нафар фуқароларга ҳудудларда ташкил этилган ишчи гуруҳларга мурожаат қилишлари ва етказилган зарар пуллари қисқа муддатда уларнинг ҳисоб рақамларига пропорционал равишда ўтказилишини эслатиб ўтамиз», – дейилади МИБ тақдим этган маълумотда.

Тергов ва суд даврида аниқланган жами зарар миқдори 9 миллиард сўмга яқин. Ишни кўриб чиққан судья Ғ.Амоновнинг маълум қилишича 422 миллион сўм пул ва 60 миллион сўмлик бир дона автотранспорт воситаси ундирувни таъминлаш учун хатланган.

Бандлик ва меҳнат муносабатлари вазири ўринбосари Баҳодир Умрзоқовнинг сўзларига кўра, фуқароларга етказилган зарар тўлиқ қопланади. Зaрaрнинг қўшимча қисми Меҳнат мигрантларини қўллаб-қувватлаш жамғармаси орқали тўлаб берилади.

Жабрланувчилар қуйидаги манзил бўйича мурожаат қилишлари сўралмоқда:

Аввалроқ Korean and migrations хусусий бандлик агентлиги мансабдорларига тайинланган суд ҳукмига қисман ўзгартириш киритилгани хабар қилинганди.