Ўзбекистон Сенатининг 23-ялпи мажлисида Олий суд таркибига ўзгартиришлар киритиш масаласи кўриб чиқилди. Номзодлари Президент томонидан Олий суд судьяси лавозимига тақдим этилган уч нафар судья Сенат томонидан тасдиқланди.
Мавзуга доир: Икром Муслимов Олий суд раиси ўринбосари этиб тайинланди. Аввалги ўринбосар беш йилга қамалган эди
Роҳат Исмоилов 1976 йилда Қорақалпоғистонда туғилган. Миллати — қорақалпоқ. Маълумоти — олий. Мутахассислиги — ҳуқуқшунос. 1997 йилда Қорақалпоқ давлат университетининг юридик факультетини тамомлаган. У меҳнат фаолияти давомида ижро ва суд ҳокимиятининг турли лавозимларида ишлаган.
2007—2010 йилларда фуқаролик ишлари бўйича Нукус туманлараро суди судьяси, 2010—2013 йилларда фуқаролик ишлари бўйича Беруний туманлараро суди раиси, 2013—2014 йилларда Қорақалпоғистон фуқаролик ишлари бўйича Олий суди судьяси, 2014—2018 йилларда Ўзбекистон Олий суди судьяси бўлган. 2018 йил 30 мартдан ҳозиргача Судьялар олий кенгаши судьяси лавозимида ишлаб ишлаб келаётган эди.
Санобар Мамадалиева 1962 йилда Наманган вилоятида туғилган. Миллати — ўзбек. Маълумоти — олий. Мутахассислиги — ҳуқуқшунос. 1986 йилда Тошкент давлат университетининг юридик факультетини тамомлаган. Санобар Турсуновна узоқ йиллар адвокатлик ва ҳуқуқий маслаҳатчи сифатида фаолият юритган.
2001—2002 йилларда жиноят ишлари бўйича Наманган шаҳар суди судьяси, 2002—2013 йилларда жиноят ишлари бўйича Наманган вилояти суди судьяси лавозимида ишлаган. 2018 йилнинг 5 мартидан ҳозиргача жиноят ишлари бўйича Наманган вилояти суди судьяси сифатида меҳнат қилиб келаётган эди.
Шамсиддин Тожиев 1979 йилда Қашқадарё вилоятида туғилган. Миллати — ўзбек. Маълумоти — олий. Мутахассислиги — ҳуқуқшунос. 2001 йилда Тошкент давлат юридик институтининг бакалавр босқичини, 2003 йилда шу институтнинг магистратурасини тамомлаган. Меҳнат фаолиятини Олий судда маслаҳатчи лавозимидан бошлаб, Олий суднинг турли лавозимларида фаолият юритган.
2008—2013 йилларда жиноят ишлари бўйича Сергели тумани суди судьяси, 2013—2015 йилларда жиноят ишлари бўйича Тошкент шаҳар суди судьяси бўлган. 2015 йилдан ҳозиргача жиноят ишлари бўйича Учтепа туман суди раиси лавозимида ишлаб келаётган эди.
Изоҳ (0)