“Дарё” интернет нашри вакили Тошкент шаҳар судида Жиноят ишлари бўйича апелляция судлов ҳайъати томонидан кўриб чиқилиши режалаштирилган фирибгарлик билан боғлиқ жиноят ишини ёритишда тўсиққа учради. Очиқ суд мажлиси бўлишига қарамасдан судлов ҳайъати томонлар фикрини рўкач қилиб, ОАВ фаолиятига тўсиқ қўйди. Журналистнинг фото ва видео материаллар, ҳатто аудиоматериал олишини ҳам тақиқлади. Бунга жавобан эса мазкур иш бўйича томонлардан бирига ҳимоячи вазифасини бажараётган адвокат Темур Раҳматов судьялар ҳайъатига “отвод берди”. Воқеа ҳақида мазкур жараёнга гувоҳ бўлган “Дарё” мухбири хабар бермоқда.
Маълум бўлишича, Жиноят ишлари бўйича Сергели туман судининг 2023 йил 3 майдаги ҳукмига кўра, судланувчи Т.О. Жиноят кодексининг 168-моддаси 4-қисмининг “а” (жуда кўп миқдорда фирибгарлик жиноятини содир этиш) банди билан айбдор деб топилган ва 9 йилга озодликдан маҳрум қилинган.
“Дарё” интернет нашрига қилинган мурожаатга кўра, таҳририят журналисти суднинг қай даражада шаффоф ва ошкора ўтаётганини оммага кўрсатиш мақсадида мазкур жараёнда иштирок этиш учун суд мажлисида қатнашиб, фото ва видеоматериаллар олишга уринди. Бироқ судьялар ҳайъати “томонлар фикрини инобатга оляпмиз”, дея, очиқ суд мажлисида журналистнинг фото, видео ва аудио материаллар тўплашига тўсиқ қўйди. Судда иш қуролларсиз, шунчаки кузатувчи сифатида ўтириши кераклигини уқтирди.
Мазкур воқеадан сўнг, томонлардан бирига ҳимоячи вазифасини бажараётган адвокат Темур Раҳматов судьялар адолатига шубҳа билдириб, бу суд ҳайъатининг мазкур ишни кўриб чиқишига норози эканини, шу сабаб уларни рад этганини баён қилиб, илтимоснома киритди.
Адвокат ўз илтимосномасига ҳимоясидаги судланувчининг айбига қўшимча тарзда маҳкум Н.Ж. билан ўзаро жиноий тил бириктириб, жабрланувчи Т.Ҳ. ишончига кириб, унинг 145 минг доллар пулини фирибгарлик йўли билан қўлга киритишда айбли деб топилгани қўшилганини, маҳкум Н.Ж. Жиноят ишлари бўйича Юнусобод туман судининг 2023 йил 23 февралдаги жиноят иши бўйича айбли деб топилиб ҳукм қилинганини ва мазкур ҳукм Тошкент шаҳар суди Жиноят ишлари бўйича апелляция судлов ҳайъатида судья Ф.Тўрахўжаев иштирокида кўрилганини айтиб, бу ишда ҳам раислик қилувчи сифатида қатнашаётгани сабаб, унга ва икки судьяга “отвод берди”.
“Маҳкум Н.Ж.ни айнан 145 минг долларни фирибгарлик йўли билан қўлга киритган дея айбдор деб топгансиз. Бу борада хулосангизни биламиз. Шу сабаб ҳимоямдаги Т.О. ишида ҳам унга нисбатан айблов эълон қилинишида айнан шу иш, ўзганинг 145 минг доллар пулини фирибгарлик билан қўлга киритган деган айблов версияси мавжудлигини инобатга олсак, бу ишда сизнинг адолатли бўлишингизга шубҳа билдираман”, — деди адвокат судьялар таркибини рад этиши ҳақида гапирар экан.
Судьялар ҳайъатига киритилган мазкур илтимоснома ҳам рад этилди.
Судья Тўрахўжаевнинг илтимосномани рад этиши борасидаги тушунтиришида айтилишича, ҳақиқатан ҳам у ва унинг бир нафар шериги адвокат айтган масаладаги суд ишида иштирок этган ва хулоса берган. Аммо мазкур судьялар ҳайъатидаги учинчи судья адвокат айтган суд ишида қатнашмаганлиги сабабли адвокатнинг бутун таркибни рад этиш ҳақидаги илтимосномаси рад этилади. Суд маълум муддатга танаффус эълон қилди.
“Дарё” судьялар таркибида ўзгариш бўлиши кутилаётган судлов ҳайъатига яна илтимоснома киритиб, суд жараёнидан фото, видео ва аудиоматериаллар тўплашга ҳаракат қилади.
Изоҳ (0)