Ўзбекистоннинг олтин-валюта захиралари бир ойда 1,5 млрд долларга ошди

Ўзбекистоннинг олтин-валюта захиралари май ойида 1,5 миллиард доллардан ортиққа ошди. Бу ҳақда Марказий банк маълумотларида келтирилган.

Қайд этилишича, 1 июнь ҳолатига кўра, мамлакат захиралари бир ойлик 1,52 миллиард доллар ўсиш билан, 36,6 миллиард долларни ташкил этди. Хорижий валютадаги активлар миқдори 9,26 миллиард долларга етган.

Регулятор илк бор захираларга оид маълумотлар таркибида қимматли қоғозлар бўйича статистикани тақдим этди. Унга кўра, қимматли қоғозлар 35 миллион долларни ташкил этган. Аввалроқ Марказий банк биринчи марта хорижий давлат қимматли қоғозларига инвестиция киритганди.

Шунингдек, регуляторнинг бошқа мамлакатлар марказий банклари ҳамда ХВЖдаги депозитлари ҳажми сезиларли ошиб, 422,7 миллион долларни ташкил этган. Бошқа хорижий молия институтларининг ҳисобварақларидаги маблағлар миқдори эса бир ой давомида 1,2 миллиард долларга ошган. Натижада, кўрсаткич йил бошидаги 8,8 миллиардни қайд этган.

Олтин захиралари нима учун керак?

Оддий тил билан айтганда, бу суғурта, давлатнинг “хавфсизлик ёстиғи”. Захиралар дунёнинг деярли барча мамлакатларида фавқулодда вазиятлар учун мавжуд.

Захиралар одатда юқори ликвидли, яъни тез сотиладиган активларда сақланади. Олтин ва хорижий валюта ушбу талабларга жавоб беради — улардан исталган вақтда қарз тўлаш ёки инвестициялар учун фойдаланиш мумкин.

Майда мамлакат олтин захиралари бир оз (278,8 миллион доллар) ўсиб, 26,8 миллиард долларни ташкил этган. Захирадаги олтиннинг физик ҳажми бир оз пасайди — 11,4 миллион трой унсия.