“Саноат, радиация ва ядро хавфсизлиги соҳасида давлат назоратини такомиллаштириш бўйича қўшимча чора-тадбирлар тўғрисида”ги президент фармони қабул қилинди.
Фармонга кўра, Саноат, радиация ва ядро хавфсизлиги қўмитаси раиси ва унинг ўринбосарлари зиммасига 2025 йилда бир қатор вазифалар юкланди.
Жумладан:
- саноат, радиация ва ядро хавфсизлиги ҳамда истироҳат боғлари аттракционларидан фойдаланишдаги хавфсизлик талабларини қайта кўриб чиқиш;
- радиация ва ядро хавфсизлиги соҳасидаги халқаро стандартлар ва талабларни миллий қонунчиликка жорий этиш;
- саноат хавфсизлигини таъминлашда масофадан назорат қилиш механизмини жорий этиш;
- саноат, радиация ва ядро хавфсизлиги тўғрисидаги қонунчилик талабларини бузганлик учун жавобгарликни кучайтириш.
Тоғ-кон саноати ва геология соҳасини назорат қилиш инспекциясининг металлургия тармоғида хавфсизликни назорат қилиш функцияси қўмитага ўтказилади. Инспекция тузилмасидаги Бекобод кон-техника инспекцияси тугатилади.
Саноат, радиация ва ядро хавфсизлиги қўмитаси тузилмасида қуйидагилар ташкил этилади:
- Навоий саноат хавфсизлиги инспекцияси;
- Олмалиқ саноат хавфсизлиги инспекцияси;
- Бекобод саноат хавфсизлиги инспекцияси;
- Темирйўл саноат хавфсизлиги инспекцияси.
Саноат хавфсизлиги соҳасини тўлиқ рақамлаштириш мақсадида қўмита 2025 йил якунигача “Ягона интеграциялашган экотизим” ахборот тизимини ишга туширади ва бошқа вазирлик ва идораларнинг ахборот тизимлари ва ресурслари билан интеграция қилинади.
2025 йил 1 июлдан саноат, радиация ва ядро хавфсизлиги соҳасидаги белгиланган ҳуқуқбузарликлар учун юридик шахсларга жарима қўллаш тартиби жорий этилади.
Изоҳ (0)