Беларусь АЭСнинг биринчи блоки яна электр тармоғига уланди

Беларусда БелАЭС ишга туширилганидан буён иккинчи марта тўхтатилган атом электр станциясининг биринчи энергоблокини ишга тушириш босқичи якунланди, деб хабар бермоқда «Коммерсантъ» мамлакат энергетика вазирлигига таяниб. Унинг тажрибавий-саноат эксплуатацияси ядро ва радиация хавфсизлиги департаменти рухсат берганидан кейин бошланади.

«Биринчи энергоблокнинг турбогенератори яна энергия тизимига уланди, у кейинчалик 500 МВт қувватгача чиқади», — дея ўз Telegram каналида маълум қилди Беларусь энергетика вазирлиги. Таъкидланишича, Бел АЭС энергоблокларининг ҳар бири 1,2 ГВт номинал қувватга эга.

Идора қайд этишича, тажрибавий-саноат эксплуатацияси чоғида реактор қурилмасининг қуввати 70 фоиздан 90 фоизгача ва 100 фоизгача оширилади. Номинал қувватда энергоблок 15 сутка давомида ишлайди, шундан сўнг комиссия уни эксплуатацияга қабул қилади.

БелАЭС 7 ноябрь куни Александр Лукашенко томонидан тантанали равишда очиб берилган. Очилиш маросимида Лукашенко Беларусь қудратли ядро давлатига айланишини маълум қилган.

9 ноябрь куни эса (баъзи манбаларда 8 ноябрь куни) АЭСнинг биринчи энергоблокида кучланиш трансформаторларининг ишдан чиқиши сабабли турбина тўхтатилгани ҳақида маълумот пайдо бўлди. Беларусь Энергетика вазирлигининг хабар беришича, атом электростанциясида «алоҳида электротехник ўлчов қурилмаларини алмаштириш зарурати аниқланган, мазкур қурилмани алмаштириш ишлари эса технологик регламентга асосан амалга оширилмоқда». 10 ноябрь куни Беларусь Давлат атом назорати хизмати алмаштирилиши керак бўлган электротехник ўлчов қурилмаси хавфсизликнинг 4-синфига тааллуқли эканлиги ва объектнинг ядровий ва радиацион хавфсизлигига таъсир қилмаслиги ҳақида хабар берди.

9 ноябрдан 19 ноябргача реаcтор трансформатор билан боғлиқ муаммолар туфайли реактор тўхтатиб қўйилган эди. Шундан кейин қурилма янгиланди ва у ишлаб кетди, аммо декабрь бошида яна иш тўхтатилгани ҳақида хабар берилди.

Беларусдаги биринчи атом электр станциясининг қурилиши 2011 йилнинг июль ойида бошланган. Унинг қурилиши учун Россиянинг «ВВЕР-1200» сув-сув реакторига эга «АЭС-2006» лойиҳаси танланган. Станция Беларуснинг шимоли-ғарбий чегарасида, Гродно вилоятининг Островец шаҳридан 18 километр узоқликдаги Ворняни шаҳарчасида — Литва пойтахти Вильнюсдан 40 километр узоқликда жойлашган. АЭСни қуриш бўйича Беларуснинг асосий ҳамкори «Росатом» давлат корпорациясининг «Атомстроекспорт» компанияси бўлган.

БелАЭСнинг 7 ноябрь куни ишга туширилган биринчи энергоблоки мамлакатнинг бирлашган энергия тизимига 3 ноябрь куни уланган. Энергия тизимига уланганидан бошлаб уч сутка давомида БелАЭСдан 22 миллион киловатт/соат электр энергияси чиқарилган.