Саноат хавфсизлиги қўмитаси назоратидаги корхоналарда 2022 йилда 81 та бахтсиз ҳодиса содир бўлди
Ўзбекистонда 2022 йилда Саноат хавфсизлиги қўмитаси назоратидаги корхона ва ташкилотларда 81 та бахтсиз ҳодисага йўл қўйилган, 28 та ҳолатда оқибат ўлим билан тугади.
Тоғ-кон, геология ва саноат хавфсизлигини назорат қилиш инспекцияси ахборот хизмати раҳбари Малика Миржамолова маълум қилишича, йил давомида назорат остидаги корхона ва ташкилотларда саноат радиация ва ядро хавфсизлиги бўйича 3 мингдан зиёд давлат назорати, 8400 дан ортиқ назорат-профилактика тадбирлари ўтказилди.
Натижада саноат, радиация хавфсизлиги талаблари ва ер ости бойликларидан фойдаланиш соҳасида 53 мингдан ортиқ қоидабузилиш ҳолати аниқланди. 32 та корхонада ишлар вақтинча тўхтатиб қўйилди. 3 мингга яқин муҳандис-техник ва раҳбар ходимга нисбатан 2 миллиард 193 миллион сўм жарима миқдорида маъмурий жазо чоралари қўланилди.
Назорат остидаги корхона ва ташкилотларда ўтган 2022 йил давомида умумий 81 та бахтсиз ҳодисага йўл қўйилиб, булардан 28 та ҳодиса оқибати ўлим билан тугаган, 5 таси гуруҳий ва 48 ҳолатда инсонлар турли даражада тан жароҳатлари олган. Бунда 60 фоиздан ортиқ ҳолатда ташкилий сабаблар, 30 фоиз ҳолатда техник сабаблар оқибатида бахтсиз ҳодиса содир бўлган.
