Ўзбекистон Олий Мажлиси Сенатининг ХVII ялпи мажлиси бугун, 14 декабрь куни ўз ишини давом эттирмоқда. Бу ҳақда «Дарё» мухбири Севара Нишонова хабар берди.
Ялпи мажлиснинг иккинчи кунида ҳам қатор муҳим масалалар, хусусан «Халқаро миграция ташкилоти Конституциясини (Брюссель, 1953 йил 19 октябрь) ратификация қилиш ҳақида»ги Ўзбекистон Республикаси Қонуни, Ўзбекистон Республикаси Президентининг 2018 йил 12 декабрдаги «Саноат, радиация ва ядро хавфсизлиги соҳасида давлат бошқаруви ва назорати тизимини тубдан такомиллаштириш чора-тадбирлари тўғрисида»ги ПФ-5594-сонли Фармонини тасдиқлаш, 2019 йилда кўп тармоқли фермер хўжаликларини ташкил этиш дастури, Ўзбекистон Республикаси Олий суди таркибига ўзгартиришлар киритиш каби масалалар ҳам кўриб чиқилади.
Сенаторлар Ўзбекистон Республикаси ички ишлар вазирининг ички ишлар органларининг жиноятчиликка қарши курашиш ва ҳуқуқбузарликнинг олдини олиш соҳасидаги фаолияти тўғрисидаги ахбороти ва Ўзбекистон Республикаси ташқи ишлар вазирининг Ўзбекистон Республикаси Ташқи ишлар вазирлиги зиммасига юкланган вазифаларни бажариш бўйича фаолияти тўғрисидаги ахбороти тинглайди.
Шунингдек, Сенат аъзолари контракт бўйича ҳарбий хизматга кириш ва уни ўташга оид қонун ҳужжатлари ижроси ҳолати ва бу соҳадаги ҳуқуқни қўллаш амалиёти юзасидан Ўзбекистон Республикаси Бош вазири Абдулла Ариповга, имконияти чекланган ёшларнинг таълим олиши учун яратилган шарт-шароитлар юзасидан Ўзбекистон Республикаси Бош вазири ўринбосари Азиз Абдуҳакимовга парламент сўрови юборади.
Изоҳ (0)