Исроил мудофаа кучлари Эрон ҳужумига қандай жавоб бериш борасида бир қарорга келди. Бу ҳақда манбаларга таяниб, The Jerusalem Post хабар берди.
Маълум қилинишича, айни дамда Исроил ҳарбийлари жавоб зарбаси санасини аниқлагани йўқ, чунки бу муайян тайёргарликни талаб қилади. Исроил минтақада кескинлашувнинг олдини олиш учун жавоб зарбасининг салбий оқибатларини “минималлаштиришга интилмоқда”.
“Ўз навбатида, жавоб ҳужуми ҳақидаги қарор унга тайёргарлик кўриш босқичида ўзгариши мумкин”, — дейди аноним манбалар.
Исроил қандай зарба беришига аниқлик киритилмаган.
“Ядровий иншоотлар нишонга олиниши ёки дронлар ва баллистик ракеталар билан ҳужум қилиниши мумкин. Эрон Ислом инқилоби қўриқчилари корпусига қарши санкциялар ёки киберҳужум варианти ҳам кўриб чиқилмоқда”, — деб ёзади The Jerusalem Post.
Эроннинг Исроилга ҳужуми ва сабаб
Эроннинг Исроилга ҳужумига 1 апрель куни Исроилнинг Дамашқдаги Эрон консуллигига берган авиазарбаси сабаб бўлди. Дипломатик кварталга уюштирган ҳужум оқибатида эронлик генераллар Муҳаммад Ризо Зоҳидий ва Муҳаммад Ҳоди ҳожа Раҳимий, шунингдек, Ислом инқилоби қўриқчилари корпусининг беш нафар зобити ҳалок бўлди.
Исроил ҳужумини Ўзбекистон ташқи ишлар вазирлиги ҳам қоралади. Эрон консуллигига уюштирилган ҳужумга жавобан 14 апрелга ўтар кечаси Исроил ҳудудига 300 дан ортиқ дрон, қанотли ва баллистик ва ракеталар учирди. Исроил армияси уларнинг 99 фоизи уриб туширилгани, бунга 3,5 миллион доллар сарфланганини даъво қилди.
Эрондан учирилган дрон ва ракеталарни уриб туширишга АҚШ ҳам ёрдам берди. Ҳужумдан кейин Жо Байден Исроил бош вазири Биньямин Нетаньяху билан суҳбатда уни Эронга жавоб зарбаси беришдан тийилишга чақирди. Теҳрон Исроилдан ҳужум бўлган тақдирда кучли қуролларини ишга солишидан огоҳлантирди. Исроил армияси Эронга, албатта, керакли вақт ва пайтда жавоб қайтарилиши, бундан бошқа чора йўқлигини эълон қилди. АҚШ мудофаа вазири Ллойд Остин исроиллик ҳамкасби Йоав Галлант билан суҳбатда вазиятни кескинлаштирмасликка чақирди.
Изоҳ (0)