Тошкентда 18—21 декабрь кунлари Tashkent City Конгресслар зали ва Humo Arena мажмуасида илк маротаба ҳукумат аъзолари билан ёшларнинг учрашуви — «Тошкент ёшлар форуми — 2020» бўлиб ўтади, деб «Дарё»га хабар берди форум ташкилотчилари .
Форумда пойтахтда фан, таълим, маданият ва санъат йўналишларида таҳсил олаётган талабалар, ижтимоий фаол ёшлар, ҳукумат аъзолари, вазирлик ва идоралар раҳбарлари, санъат ва маданият намояндалари, таниқли илм-фан арбоблари, хорижий экспертлар ҳам иштирок этиши кутилмоқда.
Тошкент шаҳар ҳокимлиги томонидан Ёшлар ишлари агентлиги ҳамда Ўзбекистон ёшлар иттифоқи ҳамкорлигида ташкил этилаётган Ёшлар форуми доирасида таълим, соғлиқни сақлаш, маданият, спорт, туризм, иқтисодиёт, банк, суд-ҳуқуқ каби кўплаб соҳаларда ёш иқтидорли кадрларни излаб топиш, уларни қўллаб-қувватлаш ва кенг жамоатчиликка танитиш, ёш ижодкорларнинг профессионал малакасини ошириш, соҳа ва тармоқ раҳбарларига ўз таклиф ва ташаббусини намойиш этишига йўл очиб бериш мақсад қилинган. Унда 5 минг нафарга яқин ёшлар ўз соҳаларида таклиф ва тақдимотлар билан қатнашади.
Форум дастурининг биринчи куни маърузалар ва иштирокчиларнинг таълим вазири Шерзод Шерматов, бош вазир ўринбосари, туризмни ривожлантириш давлат қўмитаси раиси Азиз Абдуҳакимов, адлия вазири Русланбек Давлетов, бош вазирнинг маслаҳатчиси Олимжон Умаров ва бошқалар билан очиқ учрашувларини ўз ичига олади. Кун ёш режиссёрларнинг «Дебют» қисқа метражли фильмлари намойиши билан якунланади.
Форумнинг иккинчи куни — 19 декабрь куни иштирокчиларнинг таниқли блогерлар билан учрашуви ва 2021 йилга режалаштирилган Тошкент туманларида лойиҳалар тақдимотини ўтказиш режалаштирилган. Шунқорлар ҳарбий спорт тадбирлари, «Викторина» ва «Мунозара» интеллектуал ўйинлари, «1+1» бизнес лойиҳаси, Янги Тошкент қиёфаси танлови, Ёшлар ва Медиа мукофоти ҳамда Талабалар фестивали шулар жумласидандир.
Қайд этилишича, 4 кун давом этадиган форум дастуридан Кўча спорти (Street workout) мусобақасининг республика босқичи, Ўзбекистонда ёшлар туризмини ривожлантириш, Тошкентнинг туристик салоҳиятини тарғиб қилишга қаратилган «Янги Тошкент» фото ва видеороликлар танлови совриндорларининг кўргазмаси ҳам жой олган. Тадбир якунида телекўприк орқали пойтахтлик ёшларнинг республика ёшларига мурожаати ўқиб эшиттирилади.
Шунингдек, унда Тошкент шаҳар ҳокими Жаҳонгир Ортиқхўжаев ҳам чиқиш қилиши кутилмоқда.
Шу билан бирга, 21 декабрь куни эса форум доирасидаги тадбирларда фаол иштирок этган ёшлар тақдирланиб, Humo Arena муз саройида бўлиб ўтадиган гала-концерт бўлиб ўтади.
«Тошкент ёшлар форуми – 2020»да қатнашмоқчи бўлган ёшлар tashkent2020.uz сайтида рўйхатдан ўтишлари керак бўлади.
Аввал Тошкентда бир ой давомида «Тошкент ёшларни севади» шиори билан ёшлар фестивали бўлиб ўтиши ҳақида хабар берилганди.
Изоҳ (0)