АҚШ Украинага ядровий қурол бериш имкониятини кўриб чиқмаяпти. Бу ҳақда АҚШ президентининг миллий хавфсизлик бўйича ёрдамчиси Жейк Салливан маълум қилди.
Бу ҳақда гап бўлиши ҳам мумкин эмас. Биз Украинага самарали ҳимояланиши ва Россияга қарши курашиши учун турли хил оддий қурол-яроғларни юбормоқдамиз, лекин ядровий потенциални эмас, таъкидлади Салливан.
У The New York Times мақоласига шундай изоҳ берди. Газетанинг ёзишича, бир нечта америкалик ва европалик амалдорлар АҚШ президенти Жо Байденнинг Украинага ядро қуролларини юбориши мумкинлигини тахмин қилмоқда. Гап Украинага “Совет Иттифоқи парчаланганидан кейин тортиб олинган ядро қуроли”ни қайтариш ҳақида кетмоқда.
Бу мавзу Украина учун мумкин бўлган хавфсизлик кафолатлари муҳокамасида кўтарилган. Манбаларга кўра, бундай қуролларнинг берилиши “бир зумда ва жуда катта тўхтатувчи омил бўларди”.
New York Times келтирган яна бир эҳтимолий вариант “ҳалокатли зарба” учун етарли бўлган “оддий қурол-яроғлар арсеналини” яратишдир. Тhе Times нашри эса Украина ядро қуролини яратишга қодирлигини эълон қилган.
Бунга жавобан Украина Ташқи ишлар вазирлиги мамлакат Ядро қуролини тарқатмаслик тўғрисидаги шартномага амал қилиши, ядровий материаллардан ҳарбий мақсадларда фойдаланиш имкониятини истисно этишини билдирган.
Россиянинг таҳдиди
Россия Хавфсизлик кенгаши раиси ўринбосари Дмитрий Медведев “АҚШ душманларига” ядровий қурол бўйича ишланмаларни бериш билан таҳдид қилган. У шу тариқа Ғарб давлатларини ядровий қуролларни Украинага қайтаришдан огоҳлантирган.
Медведев яқинда Россия ядровий доктринасидаги ўзгаришларни ҳисобга олган ҳолда, бундай қадам Россия учун туртки бўлиши мумкинлигини айтган. Сиёсатчи, шунингдек, Москва бунга жавобан тегишли ишланмаларни иттифоқчилар билан баҳам кўришини таъкидлаган.
Изоҳ (0)