Иқтисодиёт ва тинчлик институти 2021 йилги «Тинчликсеварлик глобал индекси»ни эълон қилди. Унда Ўзбекистон 163 давлат ичида 90-ўринни эгаллади.
Институт ҳисоботига кўра, 2020 йилга нисбатан Ўзбекистон 13 поғонага юқорилаган. Таҳлилчиларнинг фикрига кўра, Ўзбекистон ўртача тинчлик даражасига эга мамлакатлар гуруҳига киради. Шунингдек, ушбу гуруҳдан Қозоғистон (67-ўрин), Қирғизистон (76-ўрин), Тожикистон (97-ўрин), Туркманистон (109-ўрин), Озарбайжон (121-ўрин) ўрин олган.
Энг агрессив давлатлар қаторидан Шимолий Корея, Венесуэла, Судан, Россия, Ливия, Сурия, Яман ва Афғонистон ўрин эгаллаган.
Исландия энг тинч мамлакат сифатида тан олинган. Энг тинч мамлакатларнинг ўнталигига, шунингдек, Янги Зеландия, Дания, Португалия, Словения, Австрия, Швейцария, Ирландия, Чехия, Канада, Сингапур ва Япония кирган.
Бундан ташқари рўйхатда Хитой 100-ўринда, АҚШ 122-ўринда, Ҳиндистон 135-ўринда ҳамда Туркия 149-ўринда қайд этилган. Тўлиқ рўйхатни ушбу ҳаволада кўриш мумкин.
Тинчлик индексининг ўсиши 87 мамлакатда, ёмонлашуви 73 мамлакатда қайд этилган. Умуман олганда, тинчлик глобал кўрсаткичи 0,07 фоизга ёмонлашган.
Маълумот учун, жаҳон рейтингида ижтимоий бирдамлик даражаси, инсон ҳуқуқларига риоя қилиш, сиёсий ва иқтисодий барқарорлик, қамоқхоналардаги маҳбуслар сони, терроризм таҳдиди даражаси, мудофаа харажатлари ва мамлакатнинг ҳарбий ҳаракатлардаги иштироки каби омиллар ҳисобга олинган.
Бундан аввал Ўзбекистон «Сиёсатдаги аёллар» жаҳон рейтингида 45-ўринни эгаллагани, яшаш учун дунёдаги энг қулай шаҳарлар рейтинги эълон қилингани ҳамда Ўзбекистон интернет тезлиги бўйича жаҳон рейтингида яна кўтарилгани ҳақида хабар берилганди.
Изоҳ (0)