Мухолифатдаги «Тобуро» демократик партияси томонидан назорат қилинадиган Жанубий Корея миллий ассамблеяси октябрь ойида Сеулда юз берган тиқилинчга ҳукуматнинг муваффақиятсиз реакцияси сабаб ички ишлар вазири Ли Сан Минни истеъфога юбориш ташаббуси билан чиқди. Тиқилинчда 150 дан ортиқ одам ҳалок бўлганди.
Овоз беришда иштирок этган 183 депутатдан 182 нафари таклифни қўллаб-қувватлади, бир овоз ҳақиқий эмас деб топилди. Шу билан бирга, бу таклифга қарши чиққан ҳукмрон «Халқ кучи» партияси аъзолари овоз беришни бойкот қилиб, жараён бошланишидан олдин оммавий равишда залдан чиқиб кетди.
Таклиф учун камида 150 нафар қонунчининг қўллаб-қувватлови керак. Демократлар эса Миллий ассамблеядаги 299 ўриндан 169 тасига эгалик қилади. Парламент томонидан маъқулланган ҳужжат одатда президентга бир кун ичида узатилади.
Шу билан бирга, Yonhap хабар қилишича, Жанубий Корея президенти Юн Сок Ёл бу ташаббусни рад этиши кутилмоқда. Аммо шундай бўлган тақдирда, Демократик партия ички ишлар вазирига импичмент эълон қилиш билан таҳдид қилган.
Сеулдаги тиқилинч 30 октябрга ўтар кечаси кўнгилочар иншоотлар жойлашган Итхевон туманида Хеллоуин байрамини нишонлаш вақтида юз берганди. Охирги маълумотларга кўра, ҳодиса оқибатида 158 киши ҳалок бўлган, 196 киши жароҳатланган. Қурбонлар — асосан ёшлар, аксарияти аёллардир. Улар орасида жами 22 нафар хорижлик бор.
Изоҳ (0)