Россиянинг Ленинград вилоятидаги нишонларига берилган зарбалар Украина армияси узоқ масофага учувчи самарали қуролларга эга эканини кўрсатади. Бу ҳақда Defense Express компаниясига таяниб, УНИАН хабар берди.
Defense Express компаниясининг ривожланиш бўйича директори Валерий Рябих бу уруш янги босқичга ўтганини англатишини таъкидлади.
“Тўғри чизиқ бўйлаб нишонгача бўлган масофа 700 дан 900 километргача. Россия ҳаво ҳужумидан мудофаа тизимлари ва турли таҳдидли йўналишларни четлаб ўтиш учун бундай траектория 1200 километр атрофида бўлиши керак”, — деди эксперт Espresso дастурида.
Рябих узоқ масофага мўлжалланган бу қуроллар Россия армиясини ёнилғи-мойлаш материаллари билан таъминлайдиган ва иқтисодий фаолиятни амалга оширишда фойдаланадиган объектларга зарба бера олишини айтди.
“Путинни яхши кўрадиган россияликлар унинг сиёсати натижаларини ўз деразаларидан тўғридан-тўғри, фронт чизиғидан узоқда туриб ҳам кузатиши мумкин”, — деди у.
Эслатиб ўтамиз, 21 январь куни Ленинград вилоятида Россия президенти Владимир Путиннинг дўсти Геннадий Тимченкога тегишли “Новатек” компаниясининг йирик газ терминали дронлар ҳужумига учраб, ёнғин чиқди. Айнан шу терминал орқали Россия 2023 йил декабрида Urals нефтининг 85 фоизини Туркияга экспорт қилган. Портлаш вақтида терминал яқинида бошқа нарсалар қаторида турк танкери ҳам бўлган.
Изоҳ (0)