Россиянинг Ленинград вилоятида Россия президенти Владимир Путиннинг дўсти Геннадий Тимченкога тегишли “Новатек” компаниясининг йирик газ терминали дронлар ҳужумига учраб, ёниб кетди. Бу ҳақда “Фонтанка” хабар берди.
Журналист Денис Kazanскийга кўра, ёнғин дроннинг ҳужуми туфайли бошланган. Ленинград вилояти губернатори Александр Дрозденко Уст-Луга портида ёнғин содир бўлгани, ходимлар эвакуация қилинганини айтди, бироқ Россия расмийси ҳодиса сабабларини ошкор қилмаган.
Маҳаллий “Фонтанка” нашри эса ўз манбаларига таяниб, 21 январга ўтар кечаси, Уст-Лугадаги ёнғиндан бир оз олдин Россия ҳаво ҳужумидан мудофаа кучлари “Санкт-Петербург томон учаётган иккита дронни пайқаган”ини ёзди.
Нашрнинг қўшимча қилишича, шаҳарга яқинлашганда дронлар йўналишини ўзгартириб, Кингисепп тумани томон учиб, “Новатек” газ омборига ҳужум қилган.
Шу билан бирга, на вилоят ҳокимияти, на Россия Мудофаа вазирлиги фавқулодда ҳолат сабабларини ҳозирча айтмаган. Қутқарувчилар Уст-Луга портидаги Новатек терминалида чиққан ёнғинни қуршаб олган, ёнғин даражаси 2 даражага туширилган.
Айнан Уст-Лугадаги терминал орқали Россия 2023 йил декабрь ойида Уралс нефтининг 85 фоизини Туркияга экспорт қилган. Портлаш вақтида терминал яқинида бошқа нарсалар қаторида турк танкери ҳам бўлган.
Изоҳ (0)