Гулнора Каримова порахўрлик ва коррупция йўли билан қўлга киритилган маблағ эвазига Буюк Британия компанияларидан уй ва самолёт сотиб олишда фойдаланган. Бу ҳақда Freedom For Eurasia ҳисоботига таяниб, BBC хабар бермоқда.
Маълум бўлишича, Ўзбекистоннинг биринчи президенти Ислом Каримовнинг қизи Гулнора Каримова Лондондан Гонгконггача кўчмас мулклар учун 200 млн фунт ёки 240 млн доллар сарфлаган.
Оксфорд университети тадқиқотчиси Том Мейн Каримова ишини барча даврлардаги энг йирик порахўрлик ва коррупция ҳолатларидан бири деб атаган.
Бироқ Каримова ва унинг шериклари коррупсион маблағлар эвазига қўлга киритилгани айтилаётган мулкнинг бир қисмини аллақачон сотиб юборган.
Freedom For Eurasia маълумотларига кўра, Гулнора Каримова Буюк Британия, Швейцария, Франция, Дубай ва Гонконгда жами 14 та кўчмас мулкка эгалик қилган.
Таъкидланишича, биргина Буюк Британиянинг ўзида у умумий қиймати 50 миллион фунтлик бешта уй сотиб олган. Улардан бири Букингем саройининг ғарбий қисмида жойлашган хусусий кўлга эга Суррей малика уйи бўлган.
Freedom For Eurasia ҳисоботида Лондон ва Британия Виржиния оролларидаги фирмалар номи тилга олинган. Улар Каримова ва унинг шерикларига жиноят орқали олинган даромадларни сарфлаш учун хизмат қилган.
Рустам Мадумаров ва ҳозирда Каримованинг шериклари экани айтилаётган бошқалар расмий ҳужжатларда Буюк Британия, Гибралтар ва Виржиния ороллари жойлашган компанияларнинг “бенефициар эгалари” сифатида қайд этилган.
Ҳисоботда Каримовага алоқадор иккита Буюк Британия компанияси — Panally ва Оdenton Management алоҳида кўрсатилган. Уларга бухгалтерия хизматларини Ш Ландес фирмаси тақдим қилган.
Ушбу фирма кейинчалик Мадумаров орқали 40 млн долларга шахсий самолёт сотиб олинганини, пуллар Ўзбекистонда жойлашган “Ўздонробита” мобил телефон компаниясидан келганини маълум қилди.
Айнан 2004 йилларда ОАВда Гулнора Каримова томонидан сохта ҳисоб-фактуралар ёрдамида “Ўздунробита”дан 20 миллион доллар пул ўтказилгани ҳақида хабарлар тарқалган эди.
Изоҳ (0)