Буюк Британиянинг Катта миқдордаги фирибгарликка қарши кураш бюроси Гулнора Каримованинг мамлакатдаги учта ҳашаматли мулкини мусодара қилди. Булар — Белгравиядаги иккита квартира ва Суррей графлигидаги шоҳона уй, дейилади бюро маълумотларида.
Фирибгарликка қарши кураш бюроси 2018 йил октябрь ойида Каримованинг Британиядаги активларини мусодара қилиш бўйича судга мурожаат қилган эди. 2023 йил 8 август куни Буюк Британия Олий суди бу даъвони қаноатлантирди. Мусодара қилинган мулкнинг қиймати 20 миллион фунт стерлингдан (25,4 миллион доллар) кўпроққа баҳоланган.
“Биз бугунги кунда ушбу объектларни назоратга олиш учун бир нечта оффшор ҳисоб ва компаниялар билан боғлиқ мураккаб молиявий схемани аниқладик.
Бу қарор Буюк Британиядан “ифлос” пуллар олинишига барҳам бериш йўлида навбатдаги қадамдир”, — деди Фирибгарликка қарши кураш бошқармаси директори Лиза Ософски.
Бюро маълумотларида айтилишича, Каримова 2004—2012 йилларда телекоммуникация компанияларининг Ўзбекистон бозорига кириши эвазига улардан юзлаб миллион доллар пора олган.
2020 йил март ойида Тошкент шаҳар суди Гулнора Каримовани жиноий гуруҳ тузиш, фирибгарлик ва давлат маблағларини ўзлаштиришда айблаб, 13 йил-у 4 ойга озодликдан маҳрум қилган эди. Ҳозир Каримова колонияда жазо ўтамоқда.
Гулнора Каримованинг Швейцария, Франция, АҚШ ва бошқа мамлакатлардаги активларининг умумий миқдори қарийб 1,4 миллиард долларга баҳоланади.
Изоҳ (0)