Гулнора Каримова бошчилигидаги жиноий гуруҳнинг ноқонуний орттирилган ва хорижда легаллаштирилган 1 миллиард 400 миллион АҚШ доллари миқдоридаги маблағларини Ўзбекистонга қайтариш ишлари мураккаб кечмоқда. Бу ҳақда адлия вазири ўринбосари Музраф Икромов журналистлар билан мулоқотда маълум қилди, дея хабар бермоқда «Дарё» мухбири.
Музраф Икромовнинг айтишича, ноқонуний ўзлаштирилган бойликларни Ўзбекистонга қайтариш бўйича кўплаб давлатлар билан ҳамкорликда ишланмоқда.
«Гулнора Каримова ва у бошчилигидаги жиноий гуруҳнинг ноқонуний ўзлаштирган бойликлари умумий ҳисобда 1 миллиард 400 миллион АҚШ долларига тенг. Бу миллий валютада 15 триллион сўм дегани. Ҳисоб-китобларга кўра, бунча миқдордаги пулларга 1 минг 400 та мактаб қурса бўларкан. Масалан, 2020-2021 йилларда Францияда жиноий гуруҳнинг кўчмас мулклари (2 та катта қаср) сотилиши натижасида 20 миллион АҚШ долларига тенг пул маблағи Ўзбекистонга қайтарилди», – деди вазирлик расмийси.
Тадбирда Бельгия қироллигида мазкур жиноий уюшган гуруҳга тегишли 240 миллион АҚШ долларилик активлар мавжудлиги айтилди. Шу билан бирга, Буюк Британияда Гулнора Каримова ва унинг шерикларига тегишли бўлган 10 миллион фунт стерлинг ва 3 та кўчмас мулк масаласи Лондон олий судида кўриб чиқилмоқда. Латвияда жиноий гуруҳга тегишли 15 миллион АҚШ долларига тенг маблағлар, 850 унция (26 килограмм) олтин сертификатлари ҳамда Рига шаҳрида жойлашган маданий-кўнгилочар мажмуа бор.
Музраф Икромовнинг таъкидлашича, маблағларни Ўзбекистонга қайтариш жараёни жуда ҳам мураккаб ҳисобланади.
«Очиғи, бу жуда ҳам оғир жараён. Лекин кўп давлатлар билан ҳамкорликда ишлаяпмиз. Уларга керакли далилларни, суд қарорларини (ҳукмларини) кўрсатяпмиз. Асосий мақсадимиз – Ўзбекистондан чиқиб кетган ноқонуний 1 миллиард 400 миллион доллар маблағларнинг ҳаммасини Ўзбекистонга қайтариш ва мамлакатимизни ривожлантиришга ишлатиш. Бу катта жараён тўхтамайди. Масалан, фақат Швейцариядан 131 миллион доллар миқдоридаги маблағларни қайтариш жараёни 2 йил давом этди. Ҳаракатлар секин-аста самарасини бермоқда. Бу пуллар Ўзбекистонда энг муҳим соҳаларга сарфланиши ҳам жуда катта назоратга олинади», – деди вазир ўринбосари.
Аввалроқ Гулнора Каримова бошчилигидаги жиноий гуруҳ томонидан ноқонуний орттирилган ва Швейцарияда легаллаштирилган 686 миллион доллар миқдоридаги маблағлар ундирилиши бўйича ишлар олиб борилаётгани хабар қилинганди. Айни пайтгача жиноий гуруҳнинг Швейцариядаги 336 миллион АҚШ доллари миқдоридаги ноқонуний маблағлари узил-кесил мусодара қилинган. Шундан 131 миллион доллари 10 ҳафта ичида Ўзбекистонга қайтарилади. 205 миллион долларни қайтариш бўйича ишлар якунига етмоқда. Ҳозирда қўшимча 307 миллион АҚШ доллари миқдоридаги маблағларни мусодара қилиш масаласи Швейцария судларида кўриб чиқилмоқда.
Эслатиб ўтамиз, Ўзбекистоннинг биринчи президенти Ислом Каримовнинг тўнғич қизи Гулнора Каримова 2015 йил августида беш йилга озодликдан маҳрум қилинган. Ўша вақтда унга нисбатан яна бир жиноят иши бўйича тергов давом этаётган эди. Жамоатчилик бу ҳақда 2017 йил июлига келибгина хабар топган.
Гулнора Каримова 2019 йил мартидан бери Тошкент вилоятининг Зангиота туманидаги 21-сон умумий тартибдаги колонияда сақланмоқда. 2019 йилнинг декабрь ойида жиноятчига нисбатан яна бир жиноят иши қўзғатилган. Яъни у ўлпон йиғиш ва қўрқитиб, мулкларни тортиб олишда айбланган. 2020 йилнинг 8 январь куни жиноят ишлари бўйича Тошкент шаҳар судида Гулнора Каримова ва бошқаларга оид жиноят иши бўйича суд мажлиси бошланди. 2020 йил 18 март куни жиноят ишлари бўйича Тошкент шаҳар суди судланувчи Гулнора Каримовани жиноий уюшма ташкил этиш, товламачилик, ўзлаштириш ва растрата йўли билан талон-торож қилиш, жиноий фаолиятдан олинган даромадларни легаллаштириш ва бошқа жиноятларни содир этганликда айбли деб топган ва унга нисбатан 13 йил 4 ой муддатга озодликдан маҳрум қилиш жазоси тайинлаган. Жиноят қонунчилиги нормаларига мувофиқ ҳамда бир неча жиноят ва ҳукмлар мажмуи бўйича жазо тайинланганлигини инобатга олган ҳолда жазо муддатини 2015 йил 21 августдан бошлаб ҳисоблаш белгиланган.
Изоҳ (0)