Швейцариядаги фуқаролик ишлари суди Гулнора Каримованинг 840 миллион долларлик бойлигига кимнинг ҳуқуқи борлигини ҳал қилиши мумкин. Бу ҳақда Financial Times хабар берди.
Йиллар давомида “Ўзбекистон маликаси” сифатида танилган Гулнора Каримованинг тўплаган 840 миллион долларлик бойлиги Швейцария банклари кассаларида, ҳукумат буйруғи билан музлатиб қўйилган.
Швейцария фуқаролик судларида узоқ вақтдан буён олиб борилаётган "ҳуқуқий жанглар" охир-оқибат активлар кимга тегишли эканини — Швейцария ёки Ўзбекистон ҳукумати, Зеромакс холдинг компанияси кредиторлари ёки Гулнора Каримованинг ўзигами — ҳал қилиши мумкин.
Жорий йилнинг 28 сентябрь куни ўн йиллик терговдан сўнг Швейцария прокуратураси Гулнора Каримовага қарши жиноий иш қўзғатди. Суд унинг бойлиги қаердан келгани ва қаерга йўналтирилиши ҳақида муҳим далилларни очиқлашни ваъда қилмоқда.
Айблов хулосаси аллақачон Зеромакс кредиторларининг янги даъволарига сабаб бўлган.
Компаниянинг кредиторлари — бразилиялик футбол юлдузларидан тортиб Германиянинг Қора ўрмонидаги ҳунармандларгача бўлган гуруҳ Каримованинг пуллари уларга компенсация сифатида берилиши кераклигини айтмоқда.
10 октябрь куни Санкт-Галленда очилган ишда улар Швейцария ҳукуматининг йиллар давомида олиб борган “интригалари” адолатни бузиш ва уларнинг даъволарига путур етказишни мақсад қилганини айтмоқда.
“Бизнинг мижозларимиз 2017 йилдан бери давом этаётган ҳукуматнинг юқори лавозимли аъзолари ўртасидаги тил бириктиришдан шикоят қилади. Швейцария ҳукумати ва (собиқ) федерал прокурорларнинг бизга нисбатан қайта-қайта ёмон муносабатидан кейин Санкт-Галлендаги судга тўлиқ ишонамиз”, — деди иш ортида турган сюрихлик адвокат Томас Рим.
Швейцария Федерал Молия Департаменти эса “айбловлар ҳеч қандай асосга эга эмас”лигини таъкидлади.
2018 йилги суд қарорига кўра, Зеромакс Гулнора Каримова томонидан назорат қилинмаган ва унга фойда келтирмаган. Шунинг учун тегишли пулларни Ўзбекистон ҳукуматига топшириш тўғри қарор. Каримованинг ўзи эса Зеромакс иши ва унга нисбатан қўйилган порахўрлик айбловлари бўйича ўзининг айбсизлигини таъкидлайди.
“У барча айбловларга эътироз билдириб, оқланиши учун курашмоқда. Швейцария банкларида музлатилган пуллар қонуний жиҳатдан уники”, — дейди Каримованинг Женевадаги адвокати Грегуар Манже.
Швейцариядаги жиноий суд жараёнининг санаси ҳали белгиланмаган, аммо барча томонлар суд ниҳоят чигалликни ҳал қилишига умид қилмоқда.
Financial Times нашри Гулнора Каримова отасининг ҳимояси остида Женевадаги уйидан дунёни айланиб чиқиб, халқаро майдонда ёрқин шахсга айланганини ёзади.
“У ўзининг улкан бойлигини намойиш этиб, бир қатор ортиқча лойиҳаларда иштирок этди, жумладан Гоогоош саҳна номи остидаги муваффақиятсиз поп карьера, VI асрни қамраб олган ипак ҳақидаги фильм, Гули мода бренди, Мйстериэусе парфюмери шулар сирасига киради”, — дейилади хабарда.
Гулноранинг БМТдаги элчи сифатидаги фаолияти унга дипломатик иммунитет берди.
“Ислом Каримов ҳукмронлигининг охирига келиб Тошкентдаги фракциялар Каримовага қарши чиқди, унинг империяси қулади. У пул ўзлаштиришда айбланиб, уй қамоғига олинди. Кейинчалик уй қамоғи бўйича тартибни бузгани учун қамоққа олинган”, — деб ёзади нашр.
2020 йилда суд уни коррупцияда айблаб, 13 йилга озодликдан маҳрум қилди. Гулнора Каримованинг юристлари суд жараёнининг адолатли эканлигини шубҳа остига олишган.
Каримованинг бойлигининг жиноий манбалари ҳақидаги иддаолар янгилик эмас.
АҚШ Адлия вазирлигининг 2019 йилдаги айблов хулосасида айтилишича, Каримова биргина телекоммуникация соҳасида Тошкентда шартнома тузмоқчи бўлган халқаро компаниялардан 850 миллион доллардан ортиқ пора олган. Иш ҳали судгача етиб бормаган.
2010 йилдан ошкор қилинган дипломатик хатларда америкалик дипломатлар уни “Ўзбекистонда нафратга дучор бўлган” ва мамлакатдаги “деярли ҳар қандай фойдали бизнесда улушга эга бўлиш йўлида ишлаган” “қароқчи барон” деб таърифлаган.
Бу ҳужжатларда, шунингдек, Зеромакс ҳақида ҳам очиқ гапирилган.
“Компанияни Гулнора Каримова бошқаради”, —дейилади телеграммалардан бирида.
2018 йилда Швейцария суди Каримованинг Зеромакс компаниясига алоқаси йўқ деган қарорга келиб, кредиторларнинг унинг музлатилган активлари бўйича даъво қўйишига тўсқинлик қилгани кўпчилик учун кутилмаган бўлди.
Швейцария прокуратураси унга қўйган айбловларида Каримова “офис” деб аталган халқаро жиноий гуруҳни бошқарганлиги айтилади.
Жавобсиз қолаётган асосий савол — бу ишда Зеромаксънинг роли қандай?
Санкт-Галлендаги иш бўйича Швейцария разведка идоралари ва полициясининг кўплаб ҳисоботлари мавжуд бўлиб, унда Каримованинг Зеромакс компаниясига алоқадорлиги ҳақида батафсил маълумотлар келтирилган.
2018 йилда бу маълумот рад этилган ёки прокуратура қарорлари туфайли судда тегишли кўриб чиқилмаган. Financial Times нашри Швейцария полицияси ҳисоботларидан бирини қўлга киритди. Ҳисоботда Гулнора Каримованинг Зеромакс билан алоқалари батафсил баён этилган, дея даъво қилмоқда кредиторлар.
Мисоллардан бирида 2016 йилда Швейцария полицияси Каримованинг Женевада ижарага олган ячейкаларини тинтув қилиш учун ордер олгани келтирилган.
"Швейцария Ўзбекистон билан Гулнора Каримованинг пулларини 2020 йилда қайтаришни бошлаш бўйича келишув имзолаган. Бироқ, судда давом этаётган кураш ҳисобга олинса, бу жараён қачон амалга ошиши номаълум", — дейилади Financial Times нашридаги хабарда.
Изоҳ (0)