Janubiy Koreya Ukrainaga 100 million dollar miqdoridagi yordamning birinchi transhini taqdim etdi.
Bu haqda Ukraina bosh vaziri Denis Shmigal ijtimoiy tarmoqlarda ma’lum qilgan.
“Janubiy Koreyadan 100 million dollar olindi, bu koreyalik hamkorlar tomonidan ijtimoiy sohani qo‘llab-quvvatlashga qaratilgan birinchi byudjet yordamidir”, dedi u.
Shmigalning aytishicha, Ukrainaga 2,1 milliard dollargacha jalb qilish imkonini beruvchi kelishuv ham imzolangan.
Avvalroq Denis Shmigal Ukraina Peace loyihasi doirasida Jahon bankidan yana 4,8 milliard dollar olishini aytib o‘tgandi.
“Biz ushbu yordamni moliyalashtirib, mamlakatimiz va xalqimizga zaruriy yordam ko‘rsatayotgan Qo‘shma Shtatlar va rivojlanish bo‘yicha hamkorlardan juda minnatdormiz”, deya ta’kidlagan u.
Ukraina 2025-yil uchun davlat byudjetidan mudofaa va xavfsizlik sektorlariga rekord darajadagi 54,2 milliard dollar (2,23 trillion grivna) ajratgan.
Shundan 17,96 milliard dollari (739 milliard grivna) qurol-yarog‘ ishlab chiqarish, xarid qilish va dronlar uchun mo‘ljallangan.
Davlat byudjetining eng katta qismi harbiy harakatlarni davom ettirishga ajratiladi. Shu bilan birga, ijtimoiy sohalar ham ustuvor yo‘nalishlar sifatida belgilangan. Jumladan:
- Ijtimoiy dasturlar uchun 10,24 milliard dollar (421 milliard grivna) ajratilib, mart oyida nafaqalar indeksatsiyasi amalga oshiriladi.
- Ta’lim uchun 4,84 milliard dollar (199 milliard grivna) va sog‘liqni saqlash uchun 5,27 milliard dollar (217 milliard grivna) ajratilgan. Ushbu mablag‘lar ta’lim va tibbiyot muassasalarini modernizatsiya qilishga yo‘naltiriladi.
- Xususan, shifoxonalarni yangilash va reabilitatsiya markazlari tashkil etish uchun 260,1 million dollar (10,7 milliard grivna), ta’lim muassasalarini modernizatsiya qilish va boshpanalar qurish uchun esa 425,4 million dollar (17,5 milliard grivna) yo‘naltirish ko‘zda tutilgan.
Izoh (0)