Париждаги Олимпия ўйинлари юлдузига айланган Жанубий кореялик спортчи қиз сериалда бош ролни ўйнайди

Жорий йил Парижда бўлиб ўтган Олимпия ўйинларининг энг кўп муҳокама қилинган спортчиларидан бири, пневматик тўппончадан ўқ отиш бўйича жанубий кореялик иштирокчи Ким Е Жига фильмда суратга тушиш таклифи берилди. Бу ҳақда The Guardian’га таяниб “Правила жизни” хабар берди.

Ким Е Жи кинодаги дебютини “Crush” мини-сериалида бошлайди ва қотил ролини ўйнайди.

Парижда 32 ёшли спортчи 10 метр масофага пневматик тўппончадан ўқ отиш бўйича кумуш медални қўлга киритди, аммо у нафақат ўзининг маҳорати билан, балки совуқ нигоҳи ва эсда қоларли қиёфаси билан томошабинларни ўзига жалб этди. Ижтимоий тармоқ фойдаланувчилари унинг хотиржамлигига қойил қолишди ва спортчини Cyberpunk 2077 ўйинлари олами учун идеал қаҳрамон деб аташди.

Олимпиада иштирокчиси миллиардер Илон Маскнинг ҳам назарига тушди: Х (Twitter) ижтимоий тармоғида тадбиркор “Ким Е Жи албатта “экшин саҳналарга бой фильмда рол ижро этиши керак” деб ёзиб қолдирди.

Турнирлардан бирида спортчининг фил шаклидаги юмшоқ ўйинчоқ билан иштирок этган фотосуратлари ҳам интернетда тарқалди. Кейинроқ Ким Е Жининг ўзи айтишича, унинг камарига тақилган ўйинчоқ унинг қизи томонидан омад тимсоли сифатида ҳадя қилинган.

Олимпия ўйинлари тугаган бўлса-да, Ким Е Жининг машҳурлиги орта бормоқда. Яқин орада у Жанубий Кореянинг Vogue журнали учун суратга тушди.