Олий Мажлис Сенатининг парламент сайловидан кейинги биринчи мажлисида Сенат раиси ва унинг ўринбосарларини сайлаш тўғрисидаги ташкилий масала кўриб чиқилди.
Конституциянинг 101-моддасига мувофиқ, президент Олий Мажлис Сенати раиси лавозимига сенатор Танзила Норбоева номзодини тақдим этди.
Танзила Норбоева давлат ва жамоат бошқарувида бой тажрибага эга экани, ўтган даврда шу лавозимдаги самарали фаолияти натижасида мамлакатимизда хотин-қизлар, болалар ҳуқуқларини таъминлаш ва уларнинг қонуний манфаатларини ҳимоя қилиш бўйича вазият сезиларли равишда яхшилангани таъкидланди.
Шунингдек, Сенат раиси биринчи ўринбосари лавозимига сенатор Содиқ Сафоев, Сенат раиси ўринбосари лавозимига сенатор Аманбай Оринбаев номзодлари тавсия этилди.
Танзила Норбоева 2019 йил 20 июндан президент томонидан Сенат аъзоси этиб тайинланган, 21 июнь куни Сенат раиси этиб сайланганди. Содиқ Сафоев 2016 йилдан буён Сенат раисининг биринчи ўринбосари лавозимида фаолият юритиб келаётганди.
Янгиланган конституцияга кўра, эндиликда сенаторлар сони 65 нафарни ташкил этади. Улар Қорақалпоғистон, вилоятлар ва Тошкент шаҳридан тенг миқдорда — 4 нафардан (илгари 6 нафардан) сайланади. Сенатнинг яна 9 нафар аъзоси (илгари 16) фан, санъат, адабиёт, ишлаб чиқариш ҳамда давлат ва жамият фаолиятининг бошқа соҳаларида катта амалий тажрибага эга бўлган энг обрўли фуқаролар орасидан президент томонидан тайинланади.
Сенат янгидан шакллангач, президентнинг 2024 йил 16 ноябрдаги фармони билан Содиқ Сафоев Сенат аъзоси этиб тайинланганди.
Изоҳ (0)