O‘zbekistonda ko‘p kvartirali uyni boshqaruvchi tashkilotlar faoliyati o‘rganilganda shartnomalarda qonundan tashqari asossiz shartlar belgilanganligi aniqlandi, deb xabar bermoqda Raqobat qo‘mitasi matbuot xizmati.
Qayd etilishicha, qo‘mitaga va uning hududiy tuzilmalariga fuqarolardan boshqaruv servis kompaniyalari (BSK) va ular tomonidan ko‘rsatilayotgan xizmatlardan norozilik bildirilgan ko‘plab murojaatlar kelib tushmoqda.
Xususan, 2024-yilning yanvar-oktyabr oylarida qo‘mitaga uy-joy kommunal xizmat ko‘rsatish, qurilish va transport sohasida iste’molchilardan jami 8434 ta murojaat kelib tushgan bo‘lsa, bulardan 380 tasi ko‘p kvartirali uylarni boshqarish sohasiga to‘g‘ri keladi.
Murojaatlar o‘rganilganda boshqaruv organlari tomonidan mulkdorlarning umumiy yig‘ilishlarni o‘tkazilmasligi, amalga oshirilgan ishlar yuzasidan hisobotlar ochiq taqdim etilmasligi va hisobotlar bilan tanishish uchun onlayn imkoniyatlarning mavjud emasligi shuningdek, ko‘rsatilmagan xizmatlar uchun asossiz qarzdorliklar hisoblanayotgani ma’lum bo‘lgan.
O‘rganishlar jarayonida shartnomalarda belgilangan qonunchilik normalariga mos kelmaydigan yoki iste’molchining huquqini cheklab qo‘yuvchi bir nechta shartlarni kiritgan qator BSKlar aniqlangan.
Xususan, Qashqadaryo viloyati, Qarshi shahrida “Lochin-Sanjar BK” MCHJning shartnoma shartlarida majburiy badallarni to‘lashda muddatdan kechiktirganlik uchun 0,1 foiz miqdorida jarima qo‘llanishi, biroq kompaniya o‘z majburiyatlarini muddatida bajarmaganlik uchun hech qanday javobgarlik belgilanmagan.
Bunday holatlar Toshkent viloyatining Ascent Gold Story MCHJ, Qashqadaryo viloyati “Omad paxtazor kommunal PBK” MCHJ, Sirdaryo viloyatida “Istiqlol kommunal xizmat ta’mir” MCHJ, Samarqand viloyatida “Nurafshon tashabbusi” MCHJ va “Afrosiyob Maroqand BSK” MCHJ va “Pastdarg‘om kommunalchi” MCHJlarida ham kuzatilgan.
Farg‘ona viloyatida faoliyat yurituvchi “Xumo Turon” MCHJ shartnomasida esa 3 oy mobaynida to‘lov amalga oshirilmagan taqdirda elektr energiyasi, gaz va suv ta’minotidan uzib qo‘yilishi qayd etilgan. Amaldagi qonunchilikka asosan BSKlarga kommunal ta’minotlardan uzib qo‘yish vakolati berilmagan.
Toshkent viloyati, Olmaliq shahrida yashovchi fuqaroning Ascent Gold Story MCHJ boshqaruv servis kompaniyasi o‘rtasida tuzilgan umumiy mol-mulkni saqlash, undan foydalanish va uni ta’mirlash bo‘yicha tuzilgan shartnomada BSK o‘z majburiyatlarini bajarmaganda yoki lozim darajada bajarilmaganlik natijasida yetkazilgan zarar davlat tomonidan qoplab berilishi to‘g‘risida asoslanmagan shart belgilangan.
Shuningdek, “Ko‘p kvartirali uylarni boshqarish to‘g‘risida”gi qonun 28-moddasining 11-xatboshida belgilangan agar boshqaruvchi tashkilot yoki boshqaruvchi shartnoma shartlarini bajarmasa, ko‘p kvartirali uydagi joylarning mulkdorlari umumiy yig‘ilish qaroriga asosan ko‘p kvartirali uyni boshqarish shartnomasini bajarishdan bir tomonlama tartibda voz kechishga va boshqa boshqaruvchi tashkilotni yoki boshqaruvchini tanlash to‘g‘risida qaror qabul qilishi asosiy huquqlaridan biri bo‘lib, lekin shartnomaning tomonlarning majburiyatlari va huquqlari to‘g‘risidagi bo‘limida mulkdorning hech qanday huquqi aks ettirilmagan.
Xabarda aytilishicha, yuqoridagi muammolar yechimi bo‘yicha Raqobat qo‘mitasi tomonidan Qurilish va uy-joy kommunal xo‘jaligi sohasida nazorat qilish inspeksiyasiga tegishli takliflar bilan ma’lumot yuborildi.
O‘zbekistonda ko‘p qavatli uylarga xizmat ko‘rsatuvchi boshqaruv organlari tomonidan pullarning maqsadsiz sarflanishi holatlari ham kuzatilgan. Aniqlangan qonunbuzilish holatlari yuzasidan to‘plangan hujjatlar huquqni muhofaza qiluvchi organlarga yuborilgan.
Statistika agenligi ma’lumotiga ko‘ra, 2024-yilning 1-yanvarida O‘zbekistonda ko‘p kvartirali uylardagi xonadonlar va yakka tartibdagi uylar soni qariyb 7,5 milliontani tashkil etgan.
Izoh (0)