Checheniston rahbari Ramzan Qodirov Komil Allamjonovga uyushtirilgan suiqasdga aloqadorligi haqidagi mish-mishlarga munosabat bildirdi. Bu haqda u o‘zining Telegram kanalida yozdi.
Bir necha hafta oldin O‘zbekistonda prezident administratsiyasi sobiq amaldori bo‘lgan avtomobil o‘qqa tutildi. Hech kim jabrlanmadi. Gumonlanuvchilardan biri allaqachon hibsga olingan, tergov barcha ishtirokchilarni va suiqasd sabablarini aniqlashi kerak.
Biroq natijalarni kutmasdan, mamlakatdagi g‘arbparast va ba’zi muxolifat OAVlari “chechen izi” haqidagi versiyani ilgari surdi, keyin esa bu izni menga qaratishdi. Mazkur provokatsiyaga javob bermoqchi emasman, dedi Qodirov.
U O‘zbekiston prezidenti Shavkat Mirziyoyevning siyosati mamlakatda axborot va huquqni muhofaza qilish sohalari ishini yaxshi yo‘lga qo‘yishga imkon berganini ta’kidladi.
Shuni ham aytib o‘tishim kerakki, agar men chindan ham biror narsani rejalashtirgan bo‘lsam, ishni oxiriga yetkazgan va yuz foiz natijaga erishgan bo‘lardim, dedi siyosatchi.
Qodirov chechenlar va o‘zbeklar qardosh xalqlar bo‘lib, ularni umumiy tarixiy o‘tmish bog‘lab turishi, O‘zbekiston esa shaxsan uning uchun otasi, Checheniston sobiq rahbari Ahmad Hoji Qodirov hayotining muhim bosqichi bilan bog‘liqligini aytdi.
Men bu axborotni mamlakatlarimiz o‘rtasidagi munosabatlarga putur yetkazishga qaratilgan ochiq-oydin urinish deb baholayman. Ishonchim komilki, bundan keyin G‘arb uydirmalari uslubidagi boshqa nashrlar ham paydo bo‘ladi, deb fikr bildirdi u.
Qodirov mazkur provokatsiya ortida kim turganini aniqlash bo‘yicha ishlar olib borilayotganini ta’kidladi.
Prezident administratsiyasi Axborot siyosati departamenti sobiq rahbari Komil Allamjonovga qurolli hujum uyushtirilgani haqida xabar berilgandi. Bosh prokuratura jinoyatni sodir etishga aloqador bo‘lgan shaxslarning uch nafari ushlanganini ma’lum qildi.
Izoh (0)