Президент томонидан “Йўл хўжалиги соҳасини янада такомиллаштириш чора-тадбирлари тўғрисида”ги қарор имзоланди, деб хабар беради Norma.
Ҳужжатга кўра, 2025 йил 1 январдан янгидан бошланадиган йўл-қурилиш объектларида лойиҳани муҳандислик бошқариш ва техник назорат қилиш ишлари аутсорсинг шартлари асосида Халқаро муҳандислар-консултантлар федерацияси (FIDIC) амалиёти ва ҳужжатларига мувофиқ мустақил ташкилотлар, шу жумладан, хусусий сектор томонидан амалга оширилади.
Шунингдек, умумий фойдаланишдаги автомобиль йўлларини юқори тезликда ҳаракатланишга оид халқаро талабларга мувофиқ лойиҳалаштириш, қуриш ва реконструкция қилиш ишларини амалга ошириш ҳамда келгусида ушбу йўлларга муқобил йўллар мавжуд бўлганда, “пуллик йўллар” тоифасига ўтказиш режалаштирилмоқда.
Хусусан, 2025 йилда Тошкент—Андижон, Тошкент—Самарқанд йўналишлари бўйича пулли йўлларни ва “Тахтақорача” довонида пулли туннелни қуриш режалаштирилган.
Ҳужжат қонун ҳужжатлари маълумотлари миллий базасида эълон қилинган ва 2023 йил 16 октябрдан кучга кирди.
Ўзбекистондаги илк пулли йўлларнинг қурилиши ҳақида 2018 йилда хабар берилганди. Ўшанда бу каби йўлларнинг биринчисини қуриш билан Германиянинг GP Günter Papenburg компанияси шуғулланиши мумкинлиги айтилганди. 2019 йилда Автомобиль йўллари қўмитаси Ўзбекистондаги илк пулли трассани қуриш учун жой танланаётганини маълум қилганди.
2022 йил октябрда Тошкент—Андижон ва Тошкент—Самарқанд пулли автомобиль йўллари 2026 йилгача қуриб битказилиши айтилган эди. Август ойида транспорт вазири ўринбосари Илҳом Абдугафаров Жаҳон банки ҳамда Европа тикланиш ва тараққиёт банки лойиҳа координаторлари пулли йўлларни қуриш бўйича қонун лойиҳасини ишлаб чиқиш масаласини муҳокама қилганди.
Изоҳ (0)