Тошкент шаҳар Учтепа туманида 18 март куни дарахт қулаб тушиши оқибатида бир нечта машина шикастланди. Бу ҳақда Фавқулодда вазиятлар вазирлиги хабар қилди.
Қайд этилишича, шу куни соат 07:22 да туманнинг Чилонзор 23-мавзе 31-уй олдида дарахт автомашиналар устига қулагани бўйича Тошкент шаҳар ФВБга хабар келиб тушган. Воқеа жойига зудлик билан 1 та қутқарув экипажи етиб борган. Дарахт қулаши оқибатида 6 та (Kia, Gentra, Nexia-3, Damas, Cobalt, Niva) енгил автомобиль шикастланган.
Ҳозирда юзага келган вазият оқибатлари тегишли ташкилотлар билан ҳамкорликда бартараф этилмоқда. Ҳодиса оқибатида жабрланган ёки ҳалок бўлганлар йўқ.
«Фавқулодда вазиятлар вазирлиги аҳолидан кучли шамол ва ёғингарчилик вақтида автотранспорт воситаларини дарахтлар остида қолдирмаслигингизни сўраб қолади», — дейилади хабарда.
Эслатиб ўтамиз, 12 март куни Тошкент шаҳри Мирзо Улуғбек туманида автомобиллар устига дарахт қулаб тушган. Фавқулодда вазиятлар вазирлиги фуқаролардан кучли шамол ва ёғингарчилик вақтида автотранспорт воситаларини дарахтлар остида қолдирмасликни сўраган. Шунингдек, Қамчиқ довонидаги икки туннел орасида жойлашган ҳудудда бир кеча-кундузда жуда кўп ёғингарчиликдан ҳосил бўлган сув оқими автомобиль йўлининг остки қисмини ўпириб туширган.
Кучли ёмғир ёғиши оқибатида Тахтақорача довонининг автомобиль йўлида қисман ўпирилиш юзага келганди. Шу сабабли 13 март куни соат 16:00 дан довон йўли автомобиллар ҳаракати учун ёпилган. Кейинчалик довонда таъмирлаш ишлари олиб борилиб, транспортлар ҳаракати учун рухсат берилган.
Бундан ташқари, Бухоро шаҳрида 11 март куни кечки пайт ҳафта давомида муттасил ёғган ёмғир оқибатида «Талипоч қалъа дарвозаси» чап томонидаги қалъа деворининг бир қисми қулаб тушган. Қалъа девори ва дарвозасини таъмирлаш учун Туризм ва маъданий мерос вазирлиги томонидан 1 миллиард сўм маблағ ажратилган.
Изоҳ (0)