Қашқадарё вилояти Тахтақорача довонида юк машинаси пастликка тушиб кетиши оқибатида ёниб кетди. Бу ҳақда вилоят Фавқулодда вазиятлар бошқармаси ахборот хизмати хабар берди.

Хабарга кўра, ҳолат 14 апрель куни соат тахминан 09:45 да Китоб туманидан ўтувчи Тахтақорача довони автомобиль йўлининг 1139-километрида содир бўлган. Самарқанд–Қашқадарё йўналиши бўйича ҳаракатланиб кетаётган, Чироқчи туманида яшовчи фуқаро О.А ўзининг эҳтиётсизлиги оқибатида Isuzu бошқарувини йўқотиб, юк машинаси пастликка тушиб кетган. 

Оқибатда ёнғин чиққан ва транспорт воситаси тўлиқ ёнган. Вазият бўйича хабар келиб тушгач, битта қутқарув бўлинма ҳамда қутқарувчилар гуруҳи манзилга етиб бориб содир бўлган ёнғин оқибатларини бартараф этган.

Қайд этилишича, ушбу юк машинасида бўлган 24 ёшли фуқаро О.А ҳамда унга ҳамроҳлик қилаётган 2008 йилда туғилган фуқаро А.О машинадан сакраган. Сакраш оқибатида улар тан жароҳати олган ва туман тиббиёт бирлашмасига юборилган. Ҳозирда уларнинг аҳволи яхши.