Эроннинг АҚШ президенти маъмурияти билан ўзаро алоқалари бўйича “аччиқ тажриба” бор, аммо Қўшма Штатлардаги президентлик сайловлари нотўғри ёндашувларни қайта кўриб чиқиш учун имкониятдир. Бу ҳақда Эрон ТИВ матбуот котиби Эсмоил Бағай маълум қилди.
“АҚШ президентини танлаш учун масъулият халқ зиммасида. Энди халқ ўз танловини қилди”, деди Бағай IRNA билан суҳбатда.
Унинг таъкидлашича, “ушбу сайловлар ўтмишда қўлланилган нотўғри ёндашувларни қайта кўриб чиқиш учун имкониятдир”.
Бир кун аввал Эрон ҳукумати матбуот котиби Фотиме Моҳажераний Теҳронни АҚШнинг кейинги президенти ким бўлиши қизиқтирмаслигини айтган эди. Унинг сўзларига кўра, Америка маъмуриятининг ўзгариши натижасида Эронда ҳеч қандай ўзгаришлар бўлмайди.
Дональд Трампнинг биринчи президентлик муддати (2017–2021) даврида АҚШ Эрон билан ядровий келишувни бекор қилган эди. Кейинчалик Трамп буни муҳим қарор деб атаган, шунингдек, Ислом Республикасига қарши санкциялар жорий этган.
2024 йилда президентликка номзод бўлган Трамп Эрон унга суиқасд уюштиришга тайёргарлик кўраётгани ҳақидаги гумон туфайли хавфсизликни кучайтиришга қарор қилган. Эрон расмийлари барча айбловларни рад этган.
Изоҳ (0)