Дональд Трампнинг сайловолди штаби вакиллари АҚШ ҳукуматига унинг хавфсизлигини кучайтириш талаби билан мурожаат қилди, деб ёзади The Washington Post.
Газетанинг ёзишича, штаб сайловолди ташвиқоти ўтказиладиган жойлардаги парвозлар учун чекловларни кучайтиришни, учрашувлар ўтадиган штатлардаги митинг майдонларини ўқ ўтказмайдиган ойналар билан жиҳозлашни ва Трамп кортежини ҳарбий машиналар кузатиб боришини талаб қилган. Шунингдек, ҳарбий самолётларнинг сайловолди митинглари ўтказиладиган жойлар устидан учиб ўтишини таъминлаш ҳам сўралган.
The Washington Post бу сўровларни мисли кўрилмаган деб атайди, чунки сайловларнинг бутун тарихида ҳеч бир номзод ҳарбий авиация ёрдамини сўрамаган.
Сўровлар Трамп маслаҳатчилари Эрон уни ўлдириш режаларини ишлаб чиқишда давом этаётгани ҳақидаги разведка маълумотларини олганидан сўнг шакллантирилган, деб ёзади газета.
Трамп сайловолди ташвиқоти расмийлари сўнгги икки ҳафта ичида Махфий хизмат билан ёзишмаларида Трампнинг хавфсизлик чораларидан норози бўлиб, унинг сайловолди ташвиқотини режалаштиришига таҳдидлар тўсқинлик қилганини айтишди. Собиқ президент эса сайлов олдидан сўнгги ҳафталарда яна кўплаб тадбирлар ўтказиши кутилмоқда.
Изоҳ (0)