Париждаги Олимпиада ўйинларининг очилиш маросими продюсерлари ўзларига нисбатан ўлим таҳдиди муносабати билан прокуратурага мурожаат қилишди. Бу ҳақда Le Parisien нашри хабар берди.
Очилиш маросимини ўтказган “Paname 2024” компанияси электрон почта орқали бир қанча ҳақоратомуз хабарлар олган, жумладан, Қуръон оятидан иқтибос келтириш ва маросим ташкилотчиларига “Аллоҳнинг жазоси” келишини айтишган.
Шундан сўнг бош директор ўринбосари прокуратурага шикоят билан мурожаат қилган. 2 август куни Париж прокуратураси Олимпиада ўйинлари очилиш маросимининг бадиий раҳбари Том Жоллига қарши онлайн таҳдидлар туфайли тергов бошлагани маълум бўлган. У ҳам худди шу мазмундаги хатларни олган.
Тергов Париж прокуратурасининг Интернетда нафратга қарши кураш миллий маркази (PNLN) ва инсониятга қарши жиноятлар ва нафрат жиноятларига қарши кураш марказий аппарати (ОCLCH) томонидан олиб борилмоқда.
26 июль куни Парижда ёзги Олимпия ўйинларининг тантанали очилиш маросими бўлиб ўтган эди.
Тадбир давомида “Сирли кеча”га ўхшаш спектакл тақдим этилган бўлиб, унда Исо пайғамбар ва унинг шогирдлари ўрнида соқолли аёл ва аёллар кийимидаги эркаклар рол ижро этган. Спектаклни кўк рангга бўялган, қадимги юнон худоси Дионис тасвирланган деярли яланғоч одам якунлаган.
Мазкур саҳна кўриниши турли норозиликларга сабаб бўлган. Хусусан, француз епископлиги “христианларни масхара қилиш” саҳналарига норозилик билдирган. Бизнесмен Илон Маск очилиш маросимини “христианларга нисбатан очиқ ҳурматсизлик”, АҚШ президентлигига номзод Дональд Трамп эса “шармандалик” деб атаган.
Маросим мусулмонларнинг норозилигига ҳам сабаб бўлган. Хусусан, Эрон олий раҳбари Оятуллоҳ Али Хоманаий Исо Масиҳ суратининг ҳақоратли тарзда тақдим этилишини қоралаган.
Ўйинлар ташкилий қўмитасининг алоқалар бўйича директори Энн Декампснинг айтишича, Париж Олимпиадаси ташкилий қўмитаси ва режиссёр Тома Жолли Париж мери ўйинларнинг очилиш маросимидаги айрим саҳна кўринишлари билан ҳеч кимни ранжитмоқчи бўлмаган.
Изоҳ (0)