Тошкент вилоятида қум қуритиш цехи ва иссиқхона қарийб 700 млн сўмлик газдан ноқонуний фойдалангани аниқланди

Тошкент вилояти ҳудудида табиий газдан ноқонуний фойдаланиш ҳолатлари фош этилди, деб хабар беради Бош прокуратура ҳузуридаги департамент.

Қайд этилишича, департаментнинг Қибрай туман бўлими томонидан “Қибрайтумангаз” филиали ходимлари билан ҳамкорликда тезкор тадбир ўтказилган. Тадбирда “Ф.Ф.” МЧЖ раҳбари З.Ғ. ва бошқалар МЧЖнинг қум қуритиш цехида газ тармоғидан тамғалаш йўли билан узилган бўлса-да, ўзбошимчалик билан тижорат мақсадида тармоққа қайта уланиб, юқори қувватдаги сертификатланмаган газ ёндиргичдан фойдаланган ҳолда 553,4 миллион сўмлик табиий газни ноқонуний сарфлагани аниқланган.

Шу каби, департаментнинг Қуйи Чирчиқ туман бўлими томонидан “Қуйи Чирчиқтумангаз” ГТФ ходимлари билан ҳамкорликда ўтказилган текширувда “Сирғали” МФЙда яшовчи А.О. ўз уйининг 24 сотих ер майдонида иссиқхона ташкил этиб, ушбу иссиқхонани ҳеч қандай ҳужжатсиз тижорат мақсадида умумий фойдаланишдаги газ тармоғига ўғрилик йўли билан улаб, жами 149,8 миллион сўмлик табиий газдан ноқонуний фойдаланганлиги аниқланган.

Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.

Аввалроқ Самарқандда ноқонуний олтин қазувчилар 753 млн сўмлик электр энергиясини ўғирлагани маълум бўлгани, Асакада электр тармоқлари муҳандиси 13 млн сўмни фирибгарлик йўли билан қўлга киритгани тўғрисида хабар берилганди.