«Сирдарё ҳудудий электр тармоқлари» корхонасининг икки нафар ходими пора олаётган вақтида қўлга тушди. Бу ҳақда ДХХ матбуот хизмати «Дарё»га маълум қилди.
Маълум қилинишича, «Сирдарё ҳудудий электр тармоқлари» АЖнинг икки нафар ходими маҳаллий МЧЖга қарашли Гулистон тумани ҳудудидан ўтувчи Сирдарё ўзанидан қум-шағал карерига электр энергияси улаб беришни ваъда қилган. Улар 1,6 минг киловатт кучланишга эга бўлган электр трансформатори, 100 дона бетон симёғоч, 17,5 километр масофага етадиган юқори кучланишли электр симлари ва бошқа эҳтиёт қисмларни тегишли тартибда расмийлаштирмасдан, «Сирдарё ҳудудий электр тармоқлари» корхонаси ҳисобидан чиқариб бериш ҳамда соҳага тегишли идорадан ушбу уланадиган электр тармоғига техник шартларда қайд этилган талаб асосида ижобий хулоса олиб бериш эвазига МЧЖ раҳбаридан 510 миллион сўм ва 5 минг доллар талаб қилган.
ДХХ Сирдарё вилояти бўйича бошқармаси томонидан вилояти ИИБ ходимлари ҳамкорлигида ўтказилган тезкор тадбирда дастлаб «Сирдарё ҳудудий электр тармоқлари» корхонасининг Давлат ва шартномавий хизматлар кўрсатиш ҳамда ривожлантириш хизмати ходими олдиндан 300 миллион сўм ҳамда 5 минг долларни олган вақтида ушланган.
Сўнгги тезкор тадбир давом эттирилиб, у 5 минг долларни жиноий шериги — корхонанинг Мустаҳкамлик ва хавфсизлик техникаси хизмати ходимига берган вақтида у ҳам ашёвий далиллар билан қўлга олинган.
Ҳозирда ҳолат юзасидан Жиноят кодексининг 168 (фирибгарлик) ва 211-моддалари (пора бериш) билан жиноят иши қўзғатилиб, тергов ҳаракатлари олиб борилмоқда.
Аввалроқ «Юнусобод тумангаз» бўлимининг муҳандиси тадбиркордан пора олаётганда қўлга тушгани, Давлат кадастрлари палатаси Нуробод туман филиали мутахассислари 2 млн сўм пора билан ушлангани, Сирдарёда тадбиркорнинг электрдан 5 млн сўм қарзини «йўқ қилиб» бермоқчи бўлган электр тармоқлари корхонаси муҳандиси қўлга олингани тўғрисида хабар берилганди.
Изоҳ (0)