Toshkent shahar mahalliy byudjetining joriy yilning III chorak yakunlari bo‘yicha yog‘ingarchiliklar davrida suv toshqinlari bilan bog‘liq holatlarning oldini olish yuzasidan qurilish-ta’mirlash ishlarini amalga oshirish uchun 6 milliard so‘m miqdorida mablag‘ ajratdi. Bu haqda “E-qaror”da e’lon qilindi.
Poytaxt hokimi qarorida aytilishicha, Toshkent shahar mahalliy byudjetining 2024-yil davomida shakllangan qo‘shimcha manbalari hisobidan yog‘ingarchiliklar davrida suv toshqinlari bilan bog‘liq holatlarning oldini olish yuzasidan qurilish-ta’mirlash ishlarini amalga oshirish uchun 20 milliard 400 yuz million so‘m mablag‘ ajratilgan.
Toshkent shahar mahalliy byudjetining 2024-yil III chorak yakunlari bo‘yicha orttirib bajarilgan qismi hisobidan yog‘ingarchiliklar davrida suv toshqinlari bilan bog‘liq holatlarning oldini olish yuzasidan qurilish-ta’mirlash ishlarini amalga oshirish uchun 6 milliard so‘m miqdorida mablag‘ taqsimlansin, deyiladi qarorda.
Mablag‘ “Yagona buyurtmachi xizmati” injiniring kompaniyasiga o‘tkazib berish ko‘zda tutilgan.
Avvalroq prezident Shavkat Mirziyoyev poytaxtning drenaj tizimi ishiga qat’iy e’tiroz bildirib, kuchli yomg‘ir haqiqiy ahvolni ko‘rsatganini qayd etgan edi.
Drenajni to‘g‘rilashning o‘zi yetarli emasligi, suvni havzalarda to‘plash tizimini qilib, daraxtlarni sug‘orishga ishlatish maqsadga muvofiq ekani ta’kidlangandi. Umuman, poytaxtdagi tuman hokimlari joyiga chiqib, drenaj, yashillik, obodonlashtirish kabi masalalarni tepasida turib o‘zi hal qilishi shartligi aytilgan.
Shavkat Mirziyoyev yanvar oyida o‘tkazgan videoselektor yig‘ilishida poytaxtdagi drenaj tizimi yog‘ingarchilik davrida aholi e’tiroziga sabab bo‘layotganini ta’kidlab, shahar hokimligi oldiga drenaj tizimidagi eng muammoli nuqtalarda qurilish ishlarini yakunlash hamda 1-sentyabrga qadar poytaxt drenaj tizimi master-rejasini ishlab chiqish vazifasini qo‘ygan edi.
Izoh (0)