Никарагуа Исроил билан дипломатик алоқаларини узганини эълон қилди. Бу ҳақда Reuters хабар берди.
Мамлакат расмийлари бунга сабаб сифатида Исроил армиясининг Фаластин ҳудудидаги ҳарбий ҳаракатларини келтирмоқда. Никарагуа Миллий ассамблеяси ҳукуматдан Ғазодаги урушнинг бир йиллиги учун чора кўришни талаб қилувчи резолюцияни қабул қилган. Парламент Исроил ҳукуматини танқид қилувчи баёнот эълон қилган. Унда Никарагуа ассамблеяси Исроилни “инсоният душмани”, унинг ҳаракатларини эса “жиноят” деб атаган. Баёнотда можаронинг минтақанинг бошқа мамлакатларига, жумладан, Ливан, Сурия, Яман ва Эронга ҳам ёйилгани таъкидланган.
2023 йилнинг ноябрь ойида Боливия ҳам Исроил билан дипломатик муносабатларни узганини эълон қилганди. Қўшни Колумбия ва Чили эса ўз элчиларини Исроилдан маслаҳатлашиш учун чақириб олган. Ўшанда Исроил Ташқи ишлар вазирлиги Боливиянинг бу қарорини терроризм олдида таслим бўлиш, деб баҳолаганди. Туркия эса яҳудий давлати билан савдо алоқаларини тўхтатган.
Изоҳ (0)