Исроил бош вазири Биньямин Нетаньяхунинг оиласи Кайя лақабли итини парвариш қилиш ва сайр қилдириш учун профессионал энага изламоқда. Бу ҳақда Исроилнинг Vesty газетасига асосланиб, хабар бермоқда «ТАСС» .
«Исроил бош вазирининг ўғли Авнер Instagram’даги саҳифасига Кайя лақабли итини сайр қилдирадиган мутахассисни излаётгани ҳақида эълон берди», – дейилади газета хабарида. Итлар бўйича мутахассис Нетаньяху оиласига бир ҳафтага – бош вазир оиласи билан ташриф юзасидан Сингапур ва Австралияда бўлиб турганида керак бўлади.
«У ювош ва тишламайди», – деб Авнернинг сўзларидан иқтибос келтиради Vesty газетаси. Нашрнинг қайд этишича, бош вазирнинг ўғли аввал бошқа меҳмонлар ва ўзини тишлаган ит ҳозирда ўзини намунавий тутаётганига шама қилди.
Қарийб бир йил аввал Кайя бош вазир қароргоҳида Хануки – яҳудийларнинг ёруғлик байрамини нишонлаш вақтида икки меҳмонни тишлагани учун 10 кунга «ҳибсга» олинганди. 2016 йилнинг июнь ойида Кайя ўз эгаси – Биньямин Нетаньяхуни ҳам тишлади.
Маълумот учун, 10 яшар Кайя 2015 йилдан буён Исроил бош вазири оиласида яшайди. Оддий кунларда итни бош вазирнинг ўғли сайр қилдиради. Маҳаллий ОАВнинг қайд этишича, бош вазирнинг ўзи ҳам баъзида соқчилари кузатуви остида ит билан сайрга чиқади.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)