Тошкент шаҳрининг Олмазор туманидаги умумтаълим мактабларида фаолият юритувчи тадбиркорлар мактаб ошхонаси ишига туман ҳокимининг аралашувидан шикоят қилмоқда. Бу ҳақда “Дарё”га билдирганларга кўра, эндиликда мактаб ошхоналарида раҳбариятга тааллуқли тадбиркорлар фаолият юритиши мумкин.
Яқинда номаълум шахслар мактабимизга келиб, бу мактаб ошхонаси бизга ўтди, ижарадаги тадбиркор ошхонани бўшатиб қўйиши керак. Нима олиб киришган бўлса, олиб чиқиб кетишсин, дейишибди, дейди Олмазор туманидаги 185-мактаб ошхонасида фаолият юритувчи тадбиркор Моҳира Жўраева.
Суҳбатдошга кўра, бу ҳақда у туман ҳокими билан ҳам мулоқот қилган.
Мактаб раҳбарияти бу ҳақда менга айтгач, ўша номаълум кишилар бирор-бир хат-ҳужжат кўрсатишдими, деб сўрадим. Йўқ дейишди. Шу сабаб бу гапга ишонмаганим учун туман ҳокими қабулига бордим. Ҳоким бу гапни тасдиқлади. Ва тумандаги барча мактаблар битта фирмага ўтказилаётганини билдирди ва кейтеринг асосида ишланишини айтди. Шунда бу овқатлар текин бўладими, деб сўрадим. Йўқ, деди. Унда биз ҳам шу ишларни қиляпмиз-ку, мактаб ошхонасига анча пул тикканмиз дедим, дейди ҳоким қабулида бўлган мурожаатчи.
Мурожаатчининг билдиришича, у беш йил аввал мактаб ошхонасида иш бошлаган бўлиб, ўтган йиллар давомида ошхонани қайта жиҳозлаб, ўқувчиларга овқат тайёрлаш учун барча шарт-шароитни яратган.
“РайОНО” талаби билан қилган барча ишларимиз ва жиҳозларни мактаб балансига ўтказиб берганмиз. Эндиликда бу ердан чиқариб юборилсак, ишсиз қоламиз. Бундан ташқари, уч нафар ишчим ҳам бекорчи бўлиб қолади. Уларнинг ҳам оиласи бор, дейди у.
Тумандаги 249-мактаб ошхонасида ишловчи Ёрқиной Саидованинг маълумот беришича, у фаолият юритаётган тадбиркорлик субъекти мактаб ошхонасини тарк этса, ишсиз қолади.
Оилада ягона боқувчиман. Ёлғиз она сифатида фарзандимни мактаб ошхонасида ишлаб, ўзим боқаман. Вояга етмаган фарзандим шу мактабда ўқийди. Шу сабаб ишимизни олиб қўймасликларини, ишимизни давом эттиришимизни сўрайман, дейди Ёрқиной Саидова.
Тумандаги 159-мактабда фаолият юритувчи “Зокирхўжа-Озодахон” хусусий корхонаси директори Шаҳзода Абдукаримова ушбу мактабда 2013 йилдан бери фаолият юритиб келаётганини, ўтган йиллар давомида мактаб ошхонасини тамоман янгилаганини, шу пайтга қадар фаолиятидан ҳеч ким норози бўлмаганини айтмоқда.
Мактабларда овқатланишни кейтеринг тизимига ўтказиш баҳонасида ошхоналарни бошқа тадбиркорга беришмоқчи бўлишяпти. Биз, тўғриси, бу ҳаракатни умуман тушунмаяпмиз. Шу пайтга қадар қандай талаб қўйишса, қонуний бажарганмиз. Бу талабларини ҳам ўзимиз бажарар эдик. Лекин негадир бизни бу ердан чиқариб юборишмоқчи, дейди Шаҳзода Абдукаримова.
Мурожаатчи тадбиркорларга кўра, туманда 27 та мактаб ошхонасида фаолият юритувчи тадбиркорлар ҳокимнинг ушбу ҳаракатидан норози бўлмоқда. Фақат бу ҳақда ҳокимнинг шахсан ўзига эътироз билдиришга қўрқади.
Ҳоким Халқ депутатлари туман кенгашининг навбатдаги сессияларида бу масалани киритиб, депутатлар орқали бизнинг фаолиятимизга чек қўйишни ва бошқа тадбиркорни мактаб ошхонасига киритишни режа қилмоқда, дейди суҳбатдошлар.
Олмазор туман Мактабгача ва мактаб таълими бўлими мудири Абдужамил Каримовнинг “Дарё”га билдиришича, мактаб ошхоналаридаги овқатланишни кейтеринг тизимига ўтказиш ташаббуси туман ҳокимидан чиққани рост.
Бу шунчаки янги ташаббус, ҳозирча. Бу ҳақда туманимиз ҳокими Тошкент шаҳар ҳокимига маълум қилган. Мен эса шаҳар бошқармасига маълумот бердим. Айни пайтда бу ҳақда ўйлаяпмиз. Ташаббус амалга оширилган тақдирда ҳам, ошхонада савдо қилиш ҳуқуқи тендер орқали амалга оширилади. Тендер савдосида айни кунгача ишлаб келган тадбиркорлар ҳам қатнашади. Ҳеч кимни норози қилиш ниятимиз йўқ, деди туман Мактабгача ва мактаб таълими бўлими масъули.
“Дарё” журналисти билан суҳбатда бўлган Халқ депутатлари Олмазор туман кенгаши депутати Тўрабек Назаровнинг айтишича, тадбиркорларнинг ҳоким бу ишни депутатлар орқали амалга оширмоқчи, деган иддаоси нотўғри.
Бугунги сессияда ҳам, кейингиларида ҳам бу масала муҳокама қилиниши режалаштирилмаган. Бироқ шундай ташаббус бор. Бу амалга оширилиши учун биз депутатлар аввал ўрганиш олиб бориб, хулоса берамиз. Шу сабаб ҳозирдан хулоса қилиш нотўғри, деди депутат.
Туман мактабгача ва мактаб таълими бўлими мудири ҳам ушбу масала сессияда кўтарилаётганини инкор этди.
“Дарё” мавзуга қайтади.
Изоҳ (0)