Тошкентдаги мактаблар ошхонасининг аукционда сотилиши тўхтатилди

Тошкент шаҳридаги умумтаълим мактаблари ошхонаси аукцион савдолари орқали сотилиши тўхтатилди. Мактаб директорларига босим ўтказиб, ошхоналарни сотувга қўйишни талаб қилаётганларга қарши курашилади. Бунинг учун вазирга мурожаат боти ҳам ишлаб турибди. Бу ҳақда вазир Ҳилола Умарова ОАВ вакиллари билан бўлган матбуот анжуманида маълум қилди. 

Бугун, 28 август куни Тошкент шаҳридаги 298-мактабда мактабгача ва мактаб таълими вазири Ҳилола Умарова ОАВ вакиллари билан учрашиб, уларни қизиқтирган саволларга жавоб берди. 

Матбуот анжуманида сўз олган “Дарё” журналисти нашрда Тошкент шаҳрида жойлашган умумий ўрта таълим мактаблари ошхонаси тез орада тижорат масканларига айланиши мумкинлиги, Олмазор туманидаги мактаб директорлари туман ҳокими босими билан ошхоналарни аукцион савдога чиқаришга мажбур бўлаётгани ҳақида мақола эълон қилинганини айтиб, “вазир сифатида сизга мактаб ўқувчиларининг соғлом овқатланиши муҳимми? Мактаб ошхоналарининг аукцион савдода қиммат нархга сотилиб, асосий мақсад пул топиш бўлиб қолиши ўқувчилар овқатининг сифати ва нархига таъсир қилмайдими?”, дея савол берди. 

“Соғлом овқатланиш масаласи мактабгача таълим тизимида ҳам, мактаб таълими тизимида ҳам энг асосий масалаларимиздан бири ҳисобланади. Шунингдек, мактабларда тақиқланган маҳсулотлар сотилишининг олдини олишга барча раҳбарларни жалб қилганмиз. Ҳозир мактаб ўқувчиларининг соғлом овқатланишини йўлга қўйиш учун қарор ишланмоқда. Кеча ошхоналарни аукционга чиқариш бўйича берилган топшириқларни назоратга олдик”, деди вазир. 

Ҳилола Умарованинг тан олишича, ҳудудларда бошқа бир ташкилотлар томонидан ўз манфаатини кўзлаб вазирлик таркибидаги ташкилотларга ноқонуний топшириқлар бериш ҳолати (“Дарё”даги мақолаларда Олмазор тумани ҳокими тумандаги мактаб директорларига босим ўтказиб, мактаб ошхоналарини аввалига ўзига тегишли экани айтилаётган тадбиркорга беришга урингани, кейинчалик ошхоналарни аукцион савдога чиқариш бўйича топшириқлар бергани ёзилган) содир бўлмоқда. 

“Биз тизимдаги ходимларимизга доим айтганмиз, шунақа ҳолатлар бўлса вазирликнинг ишонч телефонига ёки вазирга мурожаат боти орқали бу ҳақда хабар бериш сўралган. Вазирга мурожаат ботини доим кузатиб бораман ва муаммоларни ҳал қилишга уринаман”, деди вазир. 

Ҳилола Умарованинг қўшимча қилишича, вазирлик қошида педагогларга босим ўтказиш ёки уларга ноқонуний топшириқ берганларга қарши курашувчи алоҳида жамоа, бошқарма ҳам ташкил этилган. 

“Ушбу бошқарма педагогларга босим қилаётганларни у ким бўлишидан қатъи назар қаттиқ назоратга олган”, дейди у. 

Вазир “Дарё” журналистига ходими — Тошкент шаҳар Мактабгача ва мактаб таълими бошқармаси бошлиғи Нилуфар Ҳусанованинг хатти-ҳаракати ҳақида ўқиганини, бу ҳолат такрорланмаслиги учун масъул огоҳлантирилганини қўшимча қилди.