Самарқанд вилояти Қўшработ туманида 6 январь куни 5 киши овқатдан заҳарланганди. Санитария-эпидемиологик осойишталик ва жамоат саломатлиги қўмитаси ҳолат юзасидан қўшимча маълумот берди.
Маълум бўлишича, “Зармитан” маҳалласида яшовчи 1971 йилда туғилган фуқаро Н.С. хонадонида яшовчи оила аъзоларидан, турмуш ўртоғи 1972 йил туғилган бемор Ф.С., шунингдек, 3 нафар фарзанди 1996 йилда туғилган Д.Э., 1998 йил туғилган Ш.Э. ва 2008 йилда туғилган Б.Э. туман тиббиёт бирлашмасининг реанимация бўлимига ётқизилган.
Қўшработ туман Санитария-эпидемиологик осойишталик ва жамоат саломатлиги бўлими ходимлари томонидан беморларнинг отаси Н.С.дан сўраб-суриштирилганда 2023 йил 5 январь куни соат 17:30-18:00 атрофида оила аъзолари гўштли тўғрама шўрва ва уйда қўлбола усулда тайёрлаган помидор-бодринг тузламасини истеъмол қилгани аниқланган.
Беморлар Қўшработ туман тиббиёт бирлашмаси шифокорлари томонидан кўздан кечирилганда ботулизмга хос клиник белгилар кузатилган ҳамда овқатдан заҳарланиш-ботулизм ташхиси қўйилган. Беморларда нафас олишдаги патологик ўзгаришлар бўлганлиги сабабли сунъий нафас олиш аппаратига уланиб, шифокорлар томонидан зарур тиббий муолажалар олиб борилган.
14 январь куни соат 8:30 да 1998 йил туғилган Ш.Э. кўрсатилган реанимацион ёрдамга қарамасдан ўткир юрак ва нафас етишмовчилиги оқибатида овқатдан заҳарланиш ботулизм булвар синдроми асорати диафрагма ва юрак палачи DVС синдроми ташхиси билан шифохонада вафот этган.
26 январь куни соат 21:30 да 1996 йилда туғилган Д.Э. кўрсатилган реанимацион ёрдамга қарамасдан ўткир юрак ва нафас етишмовчилиги натижасида овқатдан заҳарланиш ботулизм булвар синдроми асорати диафрагма ва юрак палачи DVС синдроми ташхиси билан вафот этган.
2008 йилда туғилган Б.Э.нинг аҳволи яхшиланганлиги учун 17 январь куни реанимация бўлимидан юқумли касалликлар бўлимига ўтказилган. Бемор Ф.С.нинг аҳволи яхшиланиб, ботулизимга хос клиник белгилари қолмаган. Шифохонадаги беморларга спесифик, симптоматик ва дезинтоксикацион даво муолажалари давом эттирилмоқда.
Шунингдек, туман тиббиёт бирлашмасининг юқумли касалликлар бўлимида даволанаётган 1971 йилда туғилган фуқаро Н.С.нинг ботулизимга хос клиник белгилари қолмаганлиги ҳамда аҳволи яхшиланганлиги сабабли 23 январь куни қониқарли аҳволда уйига жавоб берилган.
Ушбу ҳолат бўйича касаллик қайд этилган хонадондан олинган уй шароитида тайёрланган помидор-бодринг тузламаси ҳамда беморлардан олинган биоматериаллар вилоят Самарқанд вилоят Санитария-эпидемиологик осойишталик ва жамоат саломатлиги бошқармасининг бактериология лабораториясида таҳлилдан ўтказилганда уй шароитида тайёрланган помидор-бодринг тузламаси ва беморлар қусуқ массасидан ботулизм қўзғатувчиси аниқланган.
Изоҳ (0)