Ал-Қоида асосчиси Усама бен Ладеннинг ўғли Умар бен Ладенга Францияга қайтиш тақиқланди, дея Reuters хабар берди.
Қайд этилишича, у ижтимоий тармоқларда терроризмни мадҳ этувчи изоҳлар жойлаштиргани учун Франциядан депортация қилинган.
Бен Ладен ўғлининг Францияга киришини тақиқлаш ҳақидаги буйруқни мамлакат ички ишлар вазири Бруно Ретаё имзолаган. У, шунингдек, Умар аввалроқ депортация қилинганини маълум қилган. Франция Ички ишлар вазирлиги раҳбари Умарнинг қаерга жўнатилгани ҳақида батафсил маълумот бермаган.
“Бир неча йил Британия фуқаросининг эри сифатида Орн вилоятида яшаган жаноб бин Ладен 2023 йилда ижтимоий тармоқларида терроризмни мадҳ этувчи изоҳларни эълон қилди. Маъмурий тақиқ жаноб бен Ладеннинг Францияга ҳеч қандай сабабга кўра қайтиб келмаслигини кафолатлайди”, деб ёзди Ретаё Х ижтимоий тармоғида.
Reuters’га кўра, Умар бен Ладен узоқ йиллар Нормандиядаги қишлоқда яшаб, манзаралар чизиш билан шуғулланган.
“У 2011 йил май ойида Америка махсус кучлари томонидан ўлдирилган отасининг туғилган куни муносабати билан ижтимоий тармоқда жойлаган пости сабабли Франция расмийлари эътиборига тушган”, деб ёзади Le Publicateur Libre нашри.
2023 йил июль ойида газета полиция Нормандиядаги Домфорт қишлоғида бен Ладеннинг ўғлини қидираётгани ҳақида хабар берган. Reuters ижтимоий тармоқдаги постни топа олмаган. Нашр, шунингдек, Умар бен Ладен билан боғлана олмаган.
Ал-Қоида 2001 йил сентябрида АҚШга ҳужум уюштирган ва амалга оширган. Уч мингга яқин америкаликлар ва бошқа кўплаб мамлакатлар фуқаролари терактлар қурбони бўлишган.
Изоҳ (0)