Shamollashni tez davolaydi: kuzning eng shifobaxsh 5 ta rezavor mevasi

Kuz fasli tanamiz turli viruslarga qarshi kurashishi uchun qo‘shimcha yordamga muhtoj bo‘ladigan vaqt. Immun tizimini mustahkamlash va qishga tayyorgarlik ko‘rishning eng yaxshi usullaridan biri bu vitaminlar, minerallar va antioksidantlarga boy kuzgi mevalarni iste’mol qilishdir.

Ushbu maqolada shamollashdan himoya qiladigan va salomatlikni mustahkamlaydigan 5 ta eng foydali rezavor mevalarni ko‘rib chiqamiz.

Klyukva

Shifokor va diyetologlar klyukva vitamin, mineral, antioksidant va kletchatkaning haqiqiy manbai ekanini tasdiqlaydi, ushbu rezavor O‘RVIga qarshi kurashda keng qo‘llaniladi. Klyukva immunitetni mustahkamlash bo‘yicha barcha rekordlarni ortda qoldiradi, chunki u C va B vitaminlarini o‘z ichiga oladi va sovuq mavsumda organizmni zarur yordam bilan ta’minlaydi. Qolaversa, shamollash va grippdan tezroq qutulishga yordam berishi isbotlangan.

Klyukva tarkibidagi sog‘liqqa ijobiy ta’sir ko‘rsatadigan bioaktiv komponentlar surunkali yallig‘lanishni muvaffaqiyatli yengib, yallig‘lanishning oldini olishga xizmat qiladi va yuqori nafas organlari kasalliklarining oldini olishda samarali hisoblanadi. Shuningdek, klyukvaning quyidagi shifobaxsh xususiyatlari mavjud:

• Infeksion kasalliklar rivojlanish xavfini kamaytiradi;
• Yurak-qon tomir salomatligini yaxshilaydi;
• Qon tomirlar devorlarini mustahkamlaydi va xolesterin darajasini normallashtirishga yordam beradi;
• Ishtahani va ovqat hazm qilishni yaxshilaydi;
• Ichakning muntazam harakatlanishini rag‘batlantiradi va vaznni nazorat qilish uchun foydalidir.

Klyukva yangi uzilgan vaqtida, mevali sharbat, kompotlar yoki smuzi sifatida iste’mol qilinadi hamda souslar tayyorlash uchun ishlatiladi.

Chakanda (Oblepixa)

Chakanda mevasi avgust-sentyabr oylarida pishib yetiladi, u mayda, tuxumsimon yoki dumaloq, novdalarga zich yopishgan, rangi och sariq rangli meva bo‘lib, qadimdan xalq tabobatida qo‘llanilgan. Uning tarkibida A, C va E vitaminlari mavjud, ular immunitet tizimini mustahkamlashga, hujayralarni qarishdan himoya qilishga va terining holatini yaxshilashga yordam beradi. C vitamini shamollash va grippning oldini olish uchun ayniqsa foydalidir, E vitamini kuchli antioksidantdir.

Chakanda mevasi

• K guruh vitamini borligi sabab, moddalar almashinuvini boshqaradi;
• qon tarkibini yaxshilab, uning quyulishini oldini oladi;
• teri, tirnoq va soch sifatini yaxshilaydi;
• xolesterin miqdorini kamaytiradi.

Na’matak

Sovuq mavsumda immunitet turg‘un ishlashiga yordam beradigan rezavor bu na’matak bo‘lib, u C vitaminining tabiiy manbai hisoblanadi. Undan tayyorlangan choy va damlamalar shamollashdan himoya qiladi, qon tomirlari va yurak salomatligini qo‘llab-quvvatlaydi. Na’matakning foydali xususiyatlari:

• Metabolizmni yaxshilaydi va oshqozon-ichak traktining faoliyatini qo‘llab-quvvatlaydi;
• Qon tomirlarini mustahkamlaydi, ateroskleroz rivojlanish xavfini kamaytiradi;
• Yaralarni davolashni rag'batlantiradi va hujayralar yangilanishini tezlashtiradi.

Qorag‘at

Qora smorodina C vitaminiga boy rezavor, u virusli infeksiyalarga qarshi kurashishga yordam beradi. Tarkibidagi antioksidantlar hujayralarni shikastlanishdan himoya qiladi va qarish jarayonini sekinlashtiradi. Qora smorodina tarkibida arteriyalarning qotib qolishi, saraton yoki yurak kasalliklarini rivojlantirish xavfini kamaytiradigan qimmatbaho kislotalar mavjud. Bundan tashqari:

• Ko‘zlar salomatligini ta’minlaydi va ko‘rish qobiliyatini yaxshilaydi;
• Qon bosimini normallashtirishga yordam beradi;
• Yurak-qon tomir kasalliklari xavfini kamaytiradi.

Qora smorodina nonushta uchun bo‘tqalarga, shirinliklarga yoki mevali sharbatlarga qo‘shib iste’mol qilish mumkin.

Brusnika

Brusnika o‘rmon mevasi foydali va o'ziga xos yoqimli ta’mga ega rezavor. U O‘zbekistonda yetishtirilmaydi, balki import qilinadi. Brusnika organizmdagi yallig‘lanish jarayonlarining oldini olish va davolash uchun ajoyib vosita. U buyraklar salomatligini saqlashga yordam beradi va tanosil yo‘llari infeksiyalarining oldini oladi. Brusnika immunitetni mustahkamlovchi antioksidantlar va vitaminlarga boy.

• Yallig‘lanish bilan kurashishga yordam beradi;
• Qondagi shakar darajasini pasaytiradi;
• Jigar va buyraklar faoliyatini yaxshilaydi.

Ushbu rezavorni sharbat yoki kompot ko‘rinishida saqlab, qishda ichish juda foydalidir.