Малина дунёдаги энг кенг тарқалган ва юзлаб шифобахш хусусиятларга эга резавордир. У буталарда ўсади ва турли рангдаги навларда учрайди. Июнь ва август ойлари малина учун пишиқчилик даври бўлиб, мавсумий резаворни истеъмол қилиш ҳар қандай ёшдаги шахслар учун фойдалидир. Малинадан турли ширинликлар, мураббо, смузи, жем каби десертлар тайёрлаш мумкин. Ушбу мевада кўплаб витаминлар, минераллар, ўсимлик толалари ва антиоксидантлар мавжуд.
Малинанинг фойдали хусусиятлари
Шамоллашда ёрдам беради
Ушбу резавор суперфуд ҳисобланиб, турли касалликларнинг олдини олиш ва даволашда қўлланади. Масалан, малинадаги антиоксидантлар ва фитонутриентлар иммунитетни оширади, салицил ва фолий кислоталари ЎРВИдан тезроқ халос бўлишга ёрдам беради. Дарвоқе, шамоллашга қарши малинали мураббодан чой тайёрлаганда уни қайноқ сувга эмас, балки ўртача иссиқликдаги сувга солиш лозим, акс ҳолда малинанинг фойдали хусусиятлари йўқолади.
Қандли диабетнинг олдини олади
Малина қанд касаллигига чалиниш хавфини камайтириши ва инсулин миқдорини тушириши мумкинлиги олимлар томонидан аниқланган. Малина таркибидаги марганец суяклар ва тери саломатлигини таъминлаш учун зарурдир. Шунингдек, ушбу резавордаги ўсимлик толалари 2-тоифали қанд касаллиги ривожланишининг олдини олади.
Кўз нури учун фойдали
Тадқиқотлар шуни кўрсатадики, малинада мавжуд бўлган зеаксантин номли антиоксидант кўздаги сариқ доғ дегенерацияси (кўриш қобилиятининг ёмонлашишига олиб келадиган касаллик) ривожланиш хавфини камайтиришга ёрдам беради. Малинадаги C витамини катаракта (кўз гавҳарининг хира тортиши)дан ҳимоя қилади.
Овқат ҳазм қилиш тизимини яхшилайди
Малина ўсимлик толаларига бой мева бўлиб, 100 грамм маҳсулот 6,5 грамм клетчаткани ўз ичига олади. Улар ошқозон-ичак саломатлигини яхшилайди, қабзиятнинг олдини олади ҳамда ичакларда фойдали бактерияларнинг кўпайишига ёрдам беради.
Мия фаолиятини яхшилайди
Олимларнинг хулосасига кўра, малина таркибидаги флавоноидлар хотирани кучайтиради, диққатни яхшилайди, деменция, Альцгеймер ва Паркинсон касаллигининг ривожланиш хавфини камайтиради.
Камқонликнинг олдини олади
Малина темир моддасига бой резавордир. У қондаги гемоглобин даражасини оширишга ва анемиянинг олдини олишга ёрдам беради.
Юрак саломатлигини мустаҳкамлайди
Малина қон босимининг ошиб кетишидан ҳимоя қилувчи калийга бой. Шунингдек, ушбу резавор холестерин миқдорини меъёрда ушлаб туради ва юрак-қон томир касалликлари учун хавфли саналган семиришдан ҳимоя қилади.
Саратон хавфини камайтиради
Малина таркибидаги антиоксидантлар ва яллиғланишга қарши бирикмалар (эллагитаннин ва антоцианин) саратондан ҳимоя қилади. Эллагитаннин саратон ҳужайраларининг кўпайишига тўсқинлик қилади.
Бундан ташқари, малина аёллар саломатлиги учун ҳам жуда фойдали. Малина терида коллаген ишлаб чиқаришга ёрдам беради, стрессдан ҳимоя қилади, қариш жараёнини секинлаштиради ҳамда гормонларни мувозанатда сақлайди.
Малинанинг зарарли томонлари
Умуман олганда, ушбу резавор жуда фойдали мева бўлса-да, бази инсонларда аллергия қўзғаши, турли дори воситалари билан таъсирлашиши мумкин. Хусусан, қуйидаги турдаги дориларни қабул қиладиган беморлар малинадан тийилиши лозим:
- Стимуляторлар (амфетамин) қон босимини ошириб юборади;
- Варфарин (тромбларга қарши) қон кетишига олиб келади;
- Диабетга қарши дорилар;
- Аспирин (ҳароратни туширувчи дорилар) организмда салицил кислотаси кўпайиб кетишига ва ички қон кетишига олиб келади.
Изоҳ (0)