Баъзида қалқонсимон без саратонининг дастлабки белгилари оддий томоқ оғриши билан адаштириб юборилади. Саратоннинг ушбу тури эндокрин тизимида энг кенг тарқалган ўсма бўлиб, аксарият ҳолларда уни одатий даволаш ёки нур билан даволаш мумкин, фақат буни эртароқ бошлаш керак. Касаллик кўпинча қалқонсимон без ультратовуш текшируви пайтида мутлақо бошқа сабабларга кўра аниқланади. Шу билан бирга, касалликнинг энг камида олтита белгиси мавжуд бўлиб, уларга беэътибор бўлмаслик лозим.
Бўйиннинг қаттиқлашуви
Бўйиннинг аввалги ҳолатига қараганда қаттиқлашганини эркаклар соқол олаётганда, аёллар эса пардоз пайти сезиши мумкин. Шуни ёдда тутиш керакки, 90 фоиз ҳолда қалқонсимон без безовта қилмаган тақдирда ҳам уни текширувдан ўтказиш керак. Уларнинг аҳволидан хабардор бўлиш, вақти-вақти билан ультратовуш назоратида бўлиш зарур.
Овознинг дағаллашиши
Мушакларни назорат қилувчи бўғиз асаби қалқонсимон безнинг орқа қисмида жойлашган. Баъзи ҳолларда ўсимта ўсиши натижасида қалқонсимон бездан ўтиб, асабни сиқа бошлайди ёки уни шикастлайди, бу эса овозга таъсир қилади. Шунинг учун ҳам ҳеч сабабларсиз овоз бўғилиши кузатилаётган бўлса, шифокор кўригидан ўтиш лозим.
Доимий йўтал
Доимий йўтални қалқонсимон без саратони аломатларидан ажратишга ёрдам берадиган асосий белги балғам ва иситманинг кузатилмаслигидир. Бундай йўталнинг юқумли ёки вирусли касалликларга ҳеч қандай алоқаси йўқ ва аслида бу танани янги ҳолатга реакцияси бўлиб, мавжуд нарсани ташқарига чиқаришга ҳаракат қилади. Доимий йўтал кузатилаётган беморларга, албатта, шифокорга мурожаат қилиш тавсия этилади.
Ютинишда қийинчилик
Бу огоҳлантиришнинг энг муҳим белгиларидан бўлиб, саратон касаллигининг жиддийлигидан дарак беради. Шунингдек, ютинишда қийинчилик кузатилса, бу бўғиз саратони бўлиши ҳам мумкин. Уни кўрик ёрдамида аниқлаб, даволаш ишларини кечиктирмаслик муҳим.
Томоқдаги оғриқ
Кўп ҳолларда қалқонсимон безнинг ўсишини сезиб бўлмайди, аммо камдан кам пайтларда уларда оғриқ кузатилади. Кўпинча оғриқ бўйиннинг олд қисмида, баъзан тарқоқ ва ҳатто қулоқларгача оғриши ҳам мумкин.
Нафас олишдаги қийинчилик
Қалқонсимон без саратонининг яна бир белгиси – нафас олишда қийинчилик. Бу касалликнинг фақат битта шакли – анапластикадан келиб чиқади, унда ўсма жуда тез равишда ўсиб боради. Бундай ҳолатда соғлиққа жиддийроқ эътибор қаратиш керак.
Изоҳ (0)