“… Хафа бўлма, унинг касали шаҳарнинг касали, сен қишлоқнинг дўхтирисан”. Ажойиб киноасар – “Кичкина табиб” фильмидаги ушбу самимий юпатиш эсингизда бўлса керак. Эҳтимол, бу гапни эслаб, юзингизга кулги ҳам югургандир.
Ўзбекистондан хорижга бориб, у ерда трансмиллий компаниялар, йирик стартап-у, глобал брендларда мутахассис бўлиш йўлида қийинчиликлар бўлиши табиий.
Узоқ йиллар давомида шундай қийинчиликлар рўйхатида энг оғири Ўзбекистон ва ривожланган дунё иқтисодиётлари ўртасидаги фарқ бўлиб келган. Гўё, бизнинг мутахассислар қишлоқнинг дўхтири-ю, хорижий иш берувчиларга шаҳарга хос даво керакдек.
Бугун Америка Қўшма Штатларидаги дата таҳлили бўйича энг муваффақиятли стартаплар сирасига кирувчи Ахтриа компаниясида етакчи аналитик бўлиб ишлаётган Шерзод Эсанов – ана шу ғовни ёриб ўта олган қаҳрамонлардан бири. Ахир, у кўп ҳамкасблари каби Америкада эмас, Жиззах вилоятининг Ғаллаорол туманида туғилиб ўсган, кейинчалик Тошкентга кўчиб, мактабни шу ерда тамомлаган. Дунёнинг энг ривожланган мамлакатидаги бирор университетда эмас, одатда маҳаллий меҳнат бозори учун кадр тайёрлайдиган Тошкент молия институтида таҳсил олган.
Ҳаммаси институтда молиявий таҳлил ҳамда бизнес жараёнларни автоматлаштириш, замонавий технологиялар орқали ушбу йўналишларда инсон омилини камайтириш устида ишлашга қизиқишдан бошланган.
“Бакалавриатни тамомлашим Ўзбекистонда дунёга очилиш ва кўп соҳалар бўйича ислоҳотлар амалга оширила бошлаган даврга тўғри келди”, дейди Шерзод. – “Энг юқори минбарлардан хусусийлаштириш, давлат улуши бор компанияларни оптимизация қилиш ва хусусий секторга топширишга тайёрланиш, ҳатто IPO’га олиб чиқиш масалалари кўтарила бошланди. Албатта, бунда барча компанияларнинг ҳисоботлари шаффофлигини талаб қилинарди. Шунинг учун мен Молиявий Ҳисоботнинг Халқаро Стандартлари (IFRC) бўйича сертификация курсидан ўтиб чиқдим”.
Инглиз тилини аъло даражада биладиган, мамлакатнинг етакчи компаниялар эҳтиёж сезаётган йўналишда малакага эга бўлган ноёб кадрни Ўзбекистонда маиший техника ишлаб чиқарувчи гигант Artel дарров ишга олади. Artelда молиявий таҳлил бўйича фаолият юритиб, тез орада абонентлари сони бўйича мамлакатда етакчи бўлган Beeline Uzbekistan’га таклиф қилинади.
Нью Йоркдаги NASDAQ биржасида котировка қилинадиган VEON компаниясига қарашли Beeline Uzbekistan’да у Молиявий ҳисоботларнинг халқаро стандардлари бўйича етакчи мутахассис, молиявий таҳлилчи бўлиб ишлайди.
“Молиявий ҳисоботларнинг халқаро стандардлари бўйича олган билимларим амалий жиҳатдан мустаҳкамланишига бу корхона жуда катта рўл ўйнаган” дейди қаҳрамонимиз.
Қаҳрамонимиз нафақат молия, балки бизнес жараёнларнинг турли босқич ва компонентларида ўзининг техник экспертизасини ҳаётга татбиқ этган:
Катта-катта департаментларнинг ўзаро мувофиқликда ишлашига хизмат қиладиган Enterprise Resourse Planning (ERP) ахборот тизимини такомиллаштириш устида ишлаяпмиз. Бу тизимни йўлга қўйиш учун бизга Покистон ва Украинадан, шунингдек, Амстердамдаги бош қароргоҳимиздан мутахассислар келган эди. Oracle Fusion тизимини Ўзбекистондаги барча филиалларимиз ва офисларимизда жорий қилиш вақтида халқаро экспертлар билан ишлаш имкониятига эга бўлганим менга фойда бўлган, деб хотирлайди суҳбатдошимиз.
Бу компанияда катта ҳажмдаги молиявий маълумотларни илғор технологиялар ёрдамида таҳлил қилиб, бизнес қарорларни қабул қилишга кўмаклашишни ўргандим.
Ҳақиқатдан ҳам, айнан шунақа трансмиллий компанияларнинг Ўзбекистонда фаоллашиши, ўзининг бизнес жараёнларини такомиллаштиришига ёш мутахассисларни жалб қилиши туфайли Шерзод халқаро тажрибага эга бўлди.
2021 йил у магистратурани ўқиш учун АҚШга боришга қарор қилади. Ҳужжатлар топширади ва бирданига бир нечта университетга қабул қилинади. Бакалаврни ҳам грантга ўқиб тугатган Шерзодга Жорж Вашингтон университети 85 минг, Бостон университети 70 минг, Бабсон Коллеж 40 минг доллар миқдорда чегирма беришини билдиради.
– “Яхшилаб ўйлаб, биладиган инсонлар билан маслаҳатлашиб, Пеннисилвания штатидаги Лехай университетини танладим. У ерда MBA (бизнесни бошқариш бўйича магистратура) дастурига қабул қилингандим, университет 60 минг доллар миқдорида “олимлик пули”, яъни грант ажратганди. Университетдаги профессорлар таркиби кучли бўлгани, Wаll Street Journal ҳам уни АҚШнинг энг зўр университетлари рўйхатига киритгани учун айнан Лехай университетида ўқишга қарор қилдим”.
MBA дастурида бизнес аналитика бўйича курсларни ўтаган Шерзод Эсанов таҳсили давомида нафақат энг яхши профессорлар билан бирга ишлайди, илмий иш қилади, балки амалий тажрибасини ҳам оширади. Нью Жерси штатининг Порт Мюррей шаҳрида жойлашган ҳамда қайта ишланувчи, илғор полёлефин (пластик) ечимлари ишлаб чиқиш бўйича дунёда етакчи бўлган Borealis Compounds компаниясида супплй чаин ҳамда аналатика бўйича cонсултант бўлиб ишлайди ва стратегик таҳлилий ҳисоб-китоблар натижасида компаниянинг савдо айланмасини сезиларли фойдага киритади.
Ҳозирда Шерзод Эсанов биотехнология ва фармацевтика компаниялари учун хизмат кўрсатаётган Дата аналйтиcс компанияси Ахтриаъда фаолият юритмоқда. Ойдан ойга ўсиб бораётган замонавий компанияда у харидорлар хатти-ҳаракатларини ўрганиш, маркетингда қарор қабул қилишда сунъий идрок ва Machina learning технологияларини қўллаган ҳолда маълумотларни таҳлил қилиб, бизнес жараёнларни тезлаштириш ва натижада савдони ошириш бўйича таянч вазифаларни бажаряпти.
Хуллас, Ғаллаорол ва Тошкентдаги мактаб парталарида ўтириб, Ўзбекистондаги маҳаллий олий таълим муассасасини битирган мутахассис жаҳон тоифасидаги ишларни уддалаб келмоқда.
“Каттароқ мақсад қўйишдан қўрқманг, ҳаракат билан кўп нарсага эришса бўлади. Омад бу тайёргарлик ва у имконият билан учрашганда келади,” дейди у.
“Кичкина табиб”да Тешавойнинг юпанчи “ҳали буларнинг ҳам касалини ўрганиб оласан” деб давом этарди. Глобал ва регионал брендлар, жаҳон тоифасидаги компаниялар мамлакатимизга кириб келиб, фаоллашаркан, маҳаллий мутахассислар ҳам “уйдаги ўйинлар” ҳисобига тажриба тўплаб, халқаро майдонда зўр мутахассис бўлишга эриша олади.
Шуҳрат Ғайбуллаев
Изоҳ (1)
Bu inson mening tog'am