АҚШнинг Тошкентдаги элчихонаси шу ҳафтада маҳаллий ўқитувчилар билан биргаликда ўқувчи ва талабаларга бевосита дарс бериш мақсадида Ўзбекистон бўйлаб 10 ойлик ўқитиш, малака ошириш дастурларини бошлаш учун 25 нафар америкалик инглиз тили ўқитувчисини мамлакатга олиб келди. Бу ҳақда элчихона матбуот хизмати хабар берди.
Ушбу гуруҳ таркибига мактабларнинг 10-синфидан то университет даражасигача бўлган босқичда маҳаллий инглиз тили ўқитувчилари билан биргаликда дарс берувчи америкалик 17 нафар инглиз тили ўқитувчиси ҳамда университет даражасида инглиз тили ўқитиш салоҳиятини оширадиган, бошқа тилларда сўзлашувчилар учун инглиз тили ўқитишга (TESOL) ихтисослашган 8 нафар тажрибали устоз (EL Fellows) киради.
Америкалик ўқитувчиларнинг 15 нафари АҚШ давлат департаментининг Fulbrayt инглиз тили ўқитиш бўйича ёрдамчиси (EТА) дастурининг бир қисмидир, икки нафари эса Ўзбекистонда инглиз тили ўқитишни давом эттириш мақсадида Тошкентдаги АҚШ элчихонасининг “Инглиз тили ўргатувчи” дастурида аввал ҳам қатнашган EТА битирувчиларидир. Бу устозлар TESOL ёки тегишли соҳада магистр даражасига ва ўртача 10 йиллик ўқитувчилик тажрибасига эга.
25 нафар америкалик ўқитувчи Қўшма Штатларнинг турли бурчакларидан – Калифорниядан Флоридагача бўлган ҳудуддан келган бўлиб, улар Ўзбекистоннинг 11 та вилоятида инглиз тили ўқитиш ва ўрганишни қўллаб-қувватлайди. Улар, шунингдек, АҚШ ва Ўзбекистон ўртасида ўзаро англашувни мустаҳкамлаш ҳамда инглиз тилини чет тили сифатида ўқитиш (ТEFL) бўйича замонавий илғор тажрибаларни намойиш этиш орқали Қўшма Штатларнинг маданият элчилари сифатида ҳам хизмат қилади.
Америкалик мутахассисларни жалб қилган ҳолда инглиз тилини ўргатиш ташаббуслари 2019 йилда АҚШ элчихонаси ҳамда Мактабгача ва мактаб таълими вазирлиги, Олий таълим, фан ва технологиялар вазирлиги ҳамда Ўзбекистон Ташқи ишлар вазирлиги томонидан ҳамкорликда бошланган.
Бу дастурлар АҚШ ҳукуматининг Ўзбекистонда инглиз тилини ўқитиш ва ўрганишни кучайтиришга қаратилган улкан мажбуриятларининг фақат бир қисми ҳисобланади. Шавкат Мирзиёевнинг инглиз тилини ўрганиш ва узоқ муддатли иқтисодий ўсишга кўмаклашиш борасидаги ислоҳотларига мувофиқ, 2018 йилдан бери АҚШ ҳукумати Ўзбекистонда инглиз тилини ўқитиш ва ўрганишга 28 миллион доллардан ортиқ сармоя киритган.
Ушбу ёрдам бутун мамлакат бўйлаб 10 мингдан ортиқ мактаб учун юқори сифатли инглиз тили дарсликларини харид қилиш ҳамда умумтаълим мактабларидаги 15 минг нафар инглиз тили ўқитувчиси малакасини оширишни ўз ичига олади.
Изоҳ (0)