Ўзбекистонда адвокатлик институтининг бугунги кундаги мавқейи қай даражада, адвокатлар даромади қанча бўлиши мумкин, адвокатлик ростдан ҳам инсонга ҳар бир ҳолатни бошидан ўтказмаса ҳам бировларнинг аниқроғи мижозларининг ҳаётидаги хато-камчиликлардан ҳам хулоса қилиш имкониятини берадими? Инбазар савдо маркази раҳбарининг қўл остидагиларига зўравонлик қилишига юристлар қандай муносабат билдиради? “Дарё” журналисти юридик фанлари доктори, адвокат, юрист бизнесмен Ахтам Якубов билан айнан шу мавзулар атрофида суҳбатлашди.
Ҳуқуқий онг ва маданият паст бўлган мамлакатларда жиноятчиликнинг сони ошиб кетади, ўзбилармонлик авж олади, бундай мамлакатларда фуқаролар қонун-қоидалар билан яшамайди, ҳамманинг ўз қоидаси бўлади. Қашшоқлик ниҳоятда кўпаяди. Ҳуқуқий онг ва маданият юқори мамлакатларда эса барча учун яратилган умумқоидаларга ҳурмат юқори бўлади, ҳамма бунга амал қилади. Одамларда судга ва давлатга ишонч юқори бўлади, дейди Ахтам Якубов суҳбат аввалида.
Ҳуқуқшуносга кўра, ривожланган мамлакатларда, шу жумладан Ўзбекистонда ҳам ҳар бир фуқарода ҳуқуқбузарликка нисбатан тоқатсизлик кайфияти бўлиши керак ва бу шарт.
Мана масалан йўлда йўл ҳаракати хавфсизлиги қоидаларига амал қилмаган инсоннинг ҳаракатини видеога олиб, хабар берганларни рағбатлантириш механизми бор. Шунингдек, савдо дўконида савдо қилсангиз, савдогар сизга чекини бермаса бу ҳақида ҳам хабар берилса мукофотлаш тизими жорий қилинган. Аслида ҳуқуқий онгимизнинг пастлиги сабаб бу янгиликларни ҳам ўзи учун тирикчиликка айлантириб олганлар пайдо бўлди. Одатда ҳуқуқбузарликка қарши курашиш, бу ҳақда масъулларга ҳеч қандай мукофотларсиз хабар бериш, бу ҳолатларга нисбатан тоқасиз бўлиш ҳар бир фуқаронинг фуқаролик бурчи ҳисобланади, дейди суҳбатдош адвокат.
Адвокат Ахтам Якубов Сергелидаги Инбазар раҳбарининг қўл остида фаолият юритувчи ходимларга зўравонлик қилиб келганига ҳам муносабат билдирди.
Тошкентдаги йирик савдо марказларидан бири, номини тилга олмайлик унинг раҳбари ишчисига куч ишлатяпти. Бу ибтидоий жамоа тузуми давридаги ҳолатнинг бир кўринишида. Бу ёввойи, ноинсоний муносабатда. Буни ахлоқли жамиятнинг қабул қилиши мутлақо нотўғри, дейди ҳуқуқшунос.
Ахтам Якубов суҳбат давомида журналистнинг адвокатлар гонорари борасидаги саволларига жавоб қайтарар экан, Ўзбекистонда ҳуқуқшунослар яхши яшаётганини, уларнинг даромади бугун сезиларли даражада ошганини айтди.
Бугун Ўзбекистонда юристлар ёмон яшамаяпти. Айниқса, адвокатлар. Шахсан ўзим вақти келганда бир соатлик ҳуқуқий маслаҳатим учун 5 минг доллар ҳақ олганман. Айни кундаги хизмат ҳақим ҳам АҚШ долларида беш хонали сонларда белгиланган, дейди Ахтам Якубов.
Суҳбатдош ҳуқуқшунос адвокатлик масъулияти ҳақида гапирар экан, ҳимоячилик касби нафақага чиққан юристлар учун тирикчилик манбаи бўлиб қолмаслигини, бу касб эгаси доимий равишда изланишда бўлиши лозимлигини таъкидламоқда.
Изоҳ (0)