“Док-1 Макс” судида Ўзбекистонда шу сиропдан заҳарланиб, вафот этгани айтилаётган 65 нафар боланинг жасадини эксгумация қилиш сўралганди. Суднинг бугун, 3 ноябрь куни давом этган навбатдаги мажлисида эксгумациядан натижа чиқмаслиги айтилди. Бу ҳақда “Дарё” мухбири хабар берди.
“Док-1 Макс” судининг навбатдаги мажлисида Тошкент шаҳар суд тиббий экспертиза бюроси экспертлари сўроқ қилинди.
Судда сўз олган масъул, Тошкент шаҳар суд тиббий экспертиза бюроси раҳбари Нора Султонованинг маълумот беришича, 2022 йилнинг 26 декабридан бошлаб марҳум 65 нафар боланинг 9 нафарининг жасади текширилган.
2022 йилнинг 26 декабридан бошлаб Тошкент шаҳар суд тиббий экспертиза бюроси томонидан 9 нафар боланинг мурдаси экспертиза қилинган, — дейди эксперт Нора Султонова.
Масъулга кўра, республика бўйича яна 19 нафар тирик қолган бола танасида суд тиббий экспертизаси ўтказилган.
Уларнинг ҳаммасига этиленгликол заҳарланиш ташхисини қўйиб берганмиз. Сироп сабаб уларнинг 17 нафарига оғир, 2 нафарига эса енгил тан жароҳати етказилгани аниқланган, — дейди эксперт.
Судья Мусо Юсупов судда адвокатлар томонидан вафот этган 65 нафар боланинг жасадида эксгумация ўтказиш тўғрисида илтимоснома киритилганини айтиб, “Бугунги кунда эксгумация ўтказилса, заҳарли модда этиленгликолни аниқлаш имкони борми ёки йўқми”, деб сўради.
Нора Султонова айни пайтда эксгумация ўтказишдан натижа чиқмаслигини маълум қилди.
Болалар жасади тез чиришни бошлайди. Қолаверса адабиётларда этиленгликол 30 суткагача танада сақланиши мумкинлиги айтилган. Ундан ортиқ вақтга қолмайди. Шу сабаб эксгумациядан ҳеч қандай натижа чиқмайди, — дейди у.
Эслатиб ўтамиз, Ўзбекистонда “Док-1 Макс” сиропидан вафот этган болалар ўлимига деярли бир йил тўлмоқда. Мазкур сиропдан заҳарланиш ва оммавий ўлим 2022 йилнинг октябрь, ноябрь ва декабрь ойларига тўғри келган.
Изоҳ (0)