“Док-1 Макс” иши бўйича давом этаётган суднинг навбатдаги мажлисида жабрланувчилардан бири ногирон бўлиб қолган фарзандини даволатиш учун 5 миллиард сўм сўраган бўлса, яна бири 8 миллиард сўм талаб қилаётганини маълум қилди. Бу ҳақда судда қатнашган “Дарё” мухбири хабар берди.
Суднинг бугун, 17 январь куни давом этган мажлисида Marion Биотеч ПВТ. Ltd корхонасининг “Док-1 Макс” ва “Амбронол” сиропини истеъмол қилиши ортидан ногирон бўлиб қолган ва боласи вафот этган жабрланувчилар тингланди.
2019 йил туғилган боламнинг томоғи оғригани сабаб дорихона ходими тавсияси билан шу дорини олиб ичиргандик. Ўғлим бу сиропни аввал ҳам ичганди. Дори тўрт кун ичилган. Бешинчи куни болам қайт қилиб, тоби қочди. Оилавий поликлиникага чиқдик. Шифокорлар дори ёзиб беришди, уйга қайтдик. Бешинчи куни ишдан келсам, боламнинг иссиғи чиқаётган экан. Дори бериб, иссиғини туширдик. Эртаси куни ишда бўлганим сабаб, дадам юқумли касалликлар шифохонасига олиб борибди. У ерда ўғлимни кўричак дейишибди. Қувасой шаҳар шифохонасининг шифокорлари эса текшириб кўриб, кўричак эмас дейишган. Ўша куни укол олиб уйга қайтишган. Эртаси куни ўзим яна укол олса яхши бўлар деган умидда шифохонага олиб бордим. У ердагилар “бизнинг касаллик эмас, у ёққа олиб бор, бу ёққа олиб бор”, дейишди. Сўнгра яхши болалар шифокорини айтишиб, кўрсатинг дейишди. Хуллас, шу тарзда ўғлимни вилоятдаги шифохонага олиб бордик. Буйрак етишмовчилиги дейишди, — дейди 5 ёшли Нодирбек Алижонов отаси, жабрланувчининг қонуний вакили Анвар Абдуллаев.
Айни кунда беш ёшга тўлган Нодирбек Алижонов доридан заҳарланиш сабаб кўрмайдиган, эшитмайдиган ва гапира олмайдиган бўлиб қолган.
Ўғлим бугунги кунда деярли кўрмайди, эшитмайди ва гапира олмайди. Ўтира олмайди, фақат ётади. Мустақил ҳаракатлана олмайди. Ҳатто ҳожатини ҳам табиий йўл билан чиқаролмайди. Бир дақиқа назоратсиз қолдирсак, хавфли, — дейди боланинг отаси.
Жабрланувчи отанинг маълум қилишича, ўғли вилоятда даволанаётган пайтда вилоят ҳокимининг шахсан ўзи — Хайрулло Бозоров боланинг соғлиғини ўз назоратига олган. Вилоят ҳокимининг 250 миллион сўмлик ҳомийлик ёрдами эвазига хорижда ҳам даволатилган.
Шифохонага борган кунимиздан икки кун ўтгач, болам комага тушиб қолди. Кам-кам пешоб қила бошлади. Сал ўзига кела бошлагач, “дада, уйга олиб кетинг”, дерди. Кўп ўтмай, боламни Тошкентга олиб келдик. Фарзандим бу ерда икки ой комада бўлди. 40 мартадан ортиқ диализ қилинди. Тўққиз ой Тошкентда сарсон бўлиб юрдик, — дейди у.
Жабрланувчи отанинг қўшимча қилишича, у айни кунга қадар фарзандини даволатиш учун 300 миллион сўм миқдорида харажат қилган. Шунингдек, у судьянинг “болангизни даволатиш учун қилинган харажатлар ва бундан кейинги даволанишлари учун қанча товон пули сўрайсиз”, деган саволига 5 миллиард талаб қилаётганини маълум қилди.
Шунча пайтдан бери яхши ҳолатларни очяпсиз. Бу ишни сизга ишониб топширишган. Биз ҳам сизга ишониб келганмиз. Буларнинг бирортасига бориб, унча берасан, бунча берасан демадик. Ўтган сафар шеригим жони ачишиб, 3 миллиард сўм талаб қилганига эътирозлар бўлибди, мен 5 миллиард сўм сўрайман, — деди Анвар Абдуллаев.
“Док-1 Макс” сиропи сабаб гапиришдан, юришдан тўхтаган ва биринчи гуруҳ ногиронига айланган 5 ёшли Алибек Ўктамовнинг отаси Феруз Нуритдинов суднинг аввалги мажлисида фарзандини даволатиш учун айни кунга қадар 35 минг доллар харажат қилганини, боласи соғайиб кетиши учун яна 3 миллиард сўм компенсация сўрашини маълум қилганди. Бугунги судда у адвокат Ражабовнинг “нега судланувчилардан бу пулни талаб қиляпсиз?”, дея айтган эътирозидан сўнг, фикрини ўзгартирганини, эндиликда 8 миллиард сўм сўрашини билдирди. Ва судьядан бу ҳақда расмий ҳужжатларга ёзиб қўйишини илтимос қилди.
Изоҳ (0)