Ливан Исроил билан можаронинг кучайиши мумкинлиги сабабли “янги Ғазо”га айланиши мумкин. Бу фикрни CNN телеканали орқали БМТ бош котиби Антониу Гутерриш билдирди.
“Мен Ливаннинг янги Ғазога айланиши эҳтимолидан хавотирдаман. Менимча, бу бутун дунё учун даҳшатли фожиа бўлади”, деди у.
Аввалроқ Франция Ливандаги вазиятни муҳокама қилиш учун БМТ Хавфсизлик кенгаши йиғилишини чақиришни талаб қилгани хабар берилганди.
БМТ Бош ассамблеяси сессиясида Франция ташқи ишлар вазири Жан-Ноэль Барро бу ҳақда маълум қилди. У томонларни “барча учун ҳалокатли бўладиган минтақавий кескинликдан” қочишга чақирди.
Исроил 23 сентябрь куни Ливандаги юзлаб “Ҳизбуллоҳ” объектларига ҳаво ҳужумлари уюштирди. Оқибатда камида 492 киши, шу жумладан, 35 бола ҳалок бўлди. Ливан амалдорларига кўра, бу 1975—1990 йиллардаги фуқаролар уруши тугаганидан бери энг кўп қурбонлар ҳисобланади.
Изоҳ (0)