Исроил 23 сентябрь куни Ливандаги юзлаб “Ҳизбуллоҳ” объектларига ҳаво ҳужумлари уюштирди. Оқибатда камида 492 киши, шу жумладан, 35 бола ҳалок бўлди. Бу ҳақда BBC хабар берди.
Ливан амалдорларига кўра, бу 1975-1990 йиллардаги фуқаролар уруши тугаганидан бери энг кўп қурбонлар ҳисобланади. Яҳудий давлати сўнгги 24 соат ичида Ливандаги 1300 та “Ҳизбуллоҳ” объектини нишонга олганини маълум қилган. Ҳужум оқибатида 1600 дан ортиқ киши жароҳатланган.
Исроил армиясининг таъкидлашича, уларнинг ҳарбийлари “тинч аҳоли хонадонларига, қишлоқларнинг қоқ марказига жойлаштирилган” қанотли ракеталар, реактив снарядлар ва зарба берувчи дронларни нишонга олган. Яҳудий давлати улар Исроил томонга учиришни режалаштирилганини даъво қилмоқда.
Исроил армияси бош штаби бошлиғи Герси Халеви Ливандаги операциясининг кейинги босқичига тайёргарлик кетаётганини айтди.
Аслида биз “Ҳизбуллоҳ” сўнгги 20 йил давомида барпо этган жанговар инфратузилмага зарба беряпмиз. Бу жуда муҳим. Биз нишонларга зарба бериб, кейинги босқичларга тайёргарлик кўрмоқдамиз, деди у.
Исроил 23 сентябрь куни тунда Байрутга зарба берди. Reuters агентлигига кўра, Исроил мудофаа кучларининг нишони “Ҳизбуллоҳ” қўмондони Али Караки бўлган. “Ҳизбуллоҳ” Каракий “тирик , соғлом ва хавфсиз жойга кўчиб ўтган”лигини айтди.
Ливан соғлиқни сақлаш вазири Фирас Абиад ҳужумларнинг асосий мақсади ҳужумга учраган ҳудудлардаги тинч аҳолини кўчиришга мажбур қилиш эканини таъкидлади.
Исроил ҳукуматининг нияти вазиятни кескинлаштириш ва провокация қилиш экани кўриниб турибди. Биз урушнинг янги босқичига ўтдик. Аввалига бу мақсадли ҳужумлар эди, энди эса танлов қилинмаяпти, деди у.
Абиаднинг айтишича, аҳолининг мутлақ кўпчилиги урушни истамайди.
Вазиятни кескинлаштириш зарурлиги ҳақидаги қарор чет элда қабул қилинган, деди у
Франция Ливандаги вазиятни муҳокама қилиш учун БМТ Хавфсизлик кенгаши йиғилишини чақиришни талаб қилди. БМТ Бош ассамблеяси сессиясида Франция ташқи ишлар вазири Жан-Ноэл Барро бу ҳақда маълум қилди. У томонларни “барча учун ҳалокатли бўладиган минтақавий чақнашдан” қочишга чақирди.
Изоҳ (0)