Isroil 23-sentyabr kuni Livandagi yuzlab “Hizbulloh” obyektlariga havo hujumlari uyushtirdi. Oqibatda kamida 492 kishi, shu jumladan, 35 bola halok bo‘ldi. Bu haqda BBC xabar berdi.
Livan amaldorlariga ko‘ra, bu 1975-1990-yillardagi fuqarolar urushi tugaganidan beri eng ko‘p qurbonlar hisoblanadi. Yahudiy davlati so‘nggi 24 soat ichida Livandagi 1300 ta “Hizbulloh” obyektini nishonga olganini ma’lum qilgan. Hujum oqibatida 1600 dan ortiq kishi jarohatlangan.
Isroil armiyasining ta’kidlashicha, ularning harbiylari “tinch aholi xonadonlariga, qishloqlarning qoq markaziga joylashtirilgan” qanotli raketalar, reaktiv snaryadlar va zarba beruvchi dronlarni nishonga olgan. Yahudiy davlati ular Isroil tomonga uchirishni rejalashtirilganini da’vo qilmoqda.
Isroil armiyasi bosh shtabi boshlig‘i Gersi Xalevi Livandagi operatsiyasining keyingi bosqichiga tayyorgarlik ketayotganini aytdi.
Aslida biz “Hizbulloh” so‘nggi 20 yil davomida barpo etgan jangovar infratuzilmaga zarba beryapmiz. Bu juda muhim. Biz nishonlarga zarba berib, keyingi bosqichlarga tayyorgarlik ko‘rmoqdamiz, dedi u.
Isroil 23-sentyabr kuni tunda Bayrutga zarba berdi. Reuters agentligiga ko‘ra, Isroil mudofaa kuchlarining nishoni “Hizbulloh” qo‘mondoni Ali Karaki bo‘lgan. “Hizbulloh” Karakiy “tirik , sog‘lom va xavfsiz joyga ko‘chib o‘tgan”ligini aytdi.
Livan sog‘liqni saqlash vaziri Firas Abiad hujumlarning asosiy maqsadi hujumga uchragan hududlardagi tinch aholini ko‘chirishga majbur qilish ekanini ta’kidladi.
Isroil hukumatining niyati vaziyatni keskinlashtirish va provokatsiya qilish ekani ko‘rinib turibdi. Biz urushning yangi bosqichiga o‘tdik. Avvaliga bu maqsadli hujumlar edi, endi esa tanlov qilinmayapti, dedi u.
Abiadning aytishicha, aholining mutlaq ko‘pchiligi urushni istamaydi.
Vaziyatni keskinlashtirish zarurligi haqidagi qaror chet elda qabul qilingan, dedi u
Fransiya Livandagi vaziyatni muhokama qilish uchun BMT Xavfsizlik kengashi yig‘ilishini chaqirishni talab qildi. BMT Bosh assambleyasi sessiyasida Fransiya tashqi ishlar vaziri Jan-Noel Barro bu haqda ma’lum qildi. U tomonlarni “barcha uchun halokatli bo‘ladigan mintaqaviy chaqnashdan” qochishga chaqirdi.
Izoh (0)